LBS Group-in kum 20 tlin an lawm

LBS Group-in kum 20 tlin an lawm
LBS Group chuan December ni 14, 2024 khan LPS Arena, Falkland-ah an kum 20 tlin champha an lawm a, tunah hian company hrang hrang 12 thawhpui an nei mek a, LBS Group-ah hian thawktu mi 200 dawn an awm mek bawk a ni.
LBS Group Chairman T. Zosangpuii chuan kum 2004-ah khatah Rs 500 chawiin Bawngkawn Chhim Vengah dawr an luah a, secondhand bike pakhat hmangin LBS Group hi an din niin a sawi a, tunah chuan an hnuaiah automobile chi thum – Suzuki two wheeler, Kia car leh Force motor; furniture chi hnih – Evok leh Durian; oil chi thum – Gulf, Idemitsu leh Ecstar; battery chi hnih – Tata Green leh Exide; Mia Tanishq (tlereuh) leh World of Titans (sana)-ah dealership a awm tawh a ni.
LBS Group chairman Sangpuii chuan, “Hmeithai chungin ka fate panga nen LBS Group hi kan enkawl a, a tirah tawn hriat kan neih loh avangin tih fuh loh pawh kan nei nasa. Mi tam takin kan hmalakna atan min tawngtaipui a, Lalpa kan au nasa. keimahni atang hian Pathianin hmeithaite a kalsan lo tih a langin ka hria,” a ti.
2014 khan LBS Suzuki showroom hawngin reilote hnuah Mizorama lirthei ke hnih nei hralh tam ber an ni chho char char a, kum 10 chhungin 80,000 vel hralh tawhin an sumdawnna tiliantu ber a ni.
Suzuki Big Bike authorised dealer ni telin November 2019 khan lirthei hlui a thara thleng theihna Best Value an hawng tawh bawk a, Managing Director H Ngurdingliana chuan anmahni puitute chungah lawmthu sawiin, mi tam tak hnathawh Pathianin mal a sawm avanga LBS Group din thei an nih thu a sawi.
Kum 20 chhunga an tana tangkaite ngaihlutna thilpek an hlan a, 2024 chhunga peng hrang hranga hnathawk tha leh hna ngai pawimawhte hnenah chawimawina award leh Rs 5,000 theuh an pe bawk. Kum 20 tlin lawmnaah kal khawmte tan zanriah buatsaihin zan lamah concert nen hlimawm takin hun an hmang zui a ni.