LC by election turah inkokhawm

LC by election turah inkokhawm
Aizawl Municipal Corporation huamchhunga Durtlang Leitan leh ITI Veng Local Council member pakhat ve ve hmun ruak vang leh Zemabawk Local Council thiah a nih avanga inthlan thar turah India Constitution Article 243K leh 243ZA in thuneihna a pek dungzuia Mizoram Municipalities danin mawhphurhna a pek angin State Election Commission Mizoram chuan ni kumin April 19 hian heng hmunah te hian inthlan buatsaih a ni dawn a.
Inthlan tur chungchangah hian district municipal election officer Aizawl, bawrhsap Dr Lalhriatzuali Ralte chuan inthlan kaihhnawih tur sawrkar official bakah political party leh NGO aiawhte kokhawmin Nilaini khan an thukhawm a. Inthlan fel leh dik tak neih theih turin election official-te bakah political party, NGO, MPF leh mipui tanrual a ngai hle tih a sawi. Model code of conduct puan a nih hnu ah phei chuan fimkhur lehzual tura chahin, Election Commission-in a ngaihpawimawh em em rualbanlote pawhin vote an thlak theih turin theihtawp chhuah a ni dawn tih a sawi a ni.
Asst. DMEO Lalnunfela Chawngthu chuan political party-ten sawrkar office leh public building-ah party flag tar lo tur te, private building-ah a neitute phalna la chauha tar theih a nih thu te, political party-ten pamphlet an sem a nih chuan an print tirna hmun leh address chiang taka dah tur te, candidate-ten lirthei hman phalna an dil chu anmahni veivahna atan chauha tih a nih avangin voter phurh nan hman phal a nih loh thu te a sawi a ni.