LE Rangva 3rd Inter Veng U-21 Basketball Tournament

|pa Bunghai

YMA motto pakhat ‘hunawl hman that’ tih hian Zofate hi min chiahna a rei ta, he thu tawite hi Section YMA atanga Central YMA thlengin mahni thuneihnain a huam chinah bawhzuiin, tualchhung kum bithliah inelna (age level competition) leh kum bithliah lem lo (open) abikin football, basketball leh adt. sikul chawlh laiin buatsaih thin a ni a, kohhran huangah pawh a remchan dan ang angin sports week/day-te hman thin a ni.
He kalphung awmze nei tak hian Mizoram Basketball Association (MBBA) hnuaia national referee zinga thian inkawmngeih zualte rilru a luah a, rawlthar tha za rual sikul chawlh lai hunawl, MSL boruak pui tak neih zawh hlim leh MBBA calendar awl lai ni siah Inter Veng Basketball Under 21 hi kum 2022 atang khan buatsaih chhoh tan a ni.
Tunah hian a tum thumna’n Hawla Indoor Stadium-ah national referee mi pasarih leh MBBA referee mi 50 chuang intelkhawm Mizoram Referee (M. Riv) chuan Mizoram Basketball Asssociation (MBBA) leh Joint VC/ACLCA (Aizawl City Local Council Association)-te hriatpuinain April ni 22 atang khan a buatsaih chho leh ta mup mup e.
Bihchiang ila…
Kum 2022 khan team 58 zet telin, a kum leh 2023 nikum khan team 61 lai an tel thei.
A buatsaihtu lam hmathlir tha zet leh inelna buatsaih hun fuh tlat hek, kumin 2024 phei hi chuan team 65 lai an inlan thei – a kum telin hlut a hlawh telh telh e.
Sponsorship zawn hun tha lo (financial year) ni mah se a buatsaihtu lam rilruin thalaite hunawl hman that theihna tur thlir phak miau hek le, he’ng: Siaha Joint VC, Serchhip Joint VC, Kolasib Joint VC, Keifang Joint VC, Champhai Vengthlang VC leh Aizawl vengte inkhel hi tan a nih phat atangin entu an thahnem nghal hle.
Tarlan tak angin tumhnih inelna neih tawhah hian kum 2022 champion Mission Veng LC leh kum 2023 champion Khatla South LC-te’n nomawi an lo chawi tawh a ni.
Mizoram basketball tana an inpekna hmaih thiang lo, Zonet Cable TV Pvt. Ltd. chuan quarter-final atang hian live telecast-in an pe chhuak leh ang.
Thu bengverh
M. Riv lamin he Under 21 inelna a buatsaih chhawrtu ber chu kum 21 hnuai lam basketball thiam falte an ni.
Anni hian sikul thaah free admission-te an hmuh phah a, club neitu lamin contract an sign-pui zui takte an kat nuk.
Mizo thalai ruihhlo bawiha tang, mang ti ang tham thahnem tak karah nun kawng dik zawh pelh palh hun lai taka rualelna thinlung an neih theihna tura M. Riv hmalakna hi ring taka kut benga fak zui tlak a ni.
Infiamna huang atang hian a tam zawkin sum leh hamthatna hmu tura beisei hi thil atthlak a ni. Mi bik tlemte chauhin football/basketball leh adt. atang hian hlawhtlinna an hmu thin tih hi thu dik ni mah se infiamna huang atanga rual elna dik, ruihhlo hnungchhawn phahna leh invawnna a ken tel hi sumin a lei chhuah zawh loh a ni.
Basketball Federation of India (BFI) hnuaia inelnaah erawh Under 21 hi a awm miau loh avangin (BFI chuan Sub Junior – Under 14, Youth – Under 17 leh Junior – Under 19 inelna a kalpui thin), MBBA lamin he M. Riv buatsaih Mizo thalaite ngaihhlut rawn Under 21 hi an remtihna hnuaiah khelh chhunzawm a theih tawh dawn loh thu ri mek hi tualchhung lama kan hlutzia hre chunga MBBA lam paw’n bengsikin ngaihtuahna seng nawn leh thei se a duhawm ngawt mai.
CYMA leh MBBA thawkdunin Inter Branch YMA basketball inelna boruak sang tak a buatsaih thin kha rei tak chhung neih a ni tawh lo a, he U-21 inelna lehzel hi chu tawp mai lo se!
MBBA remtihna tel lova inelna hi buatsaih a hautakzia leh basketball thanna thlir chungin Mizo thalai tuihalna hi ngaihthah ni lul suh se.