Legal Services Authority hotu in Lawngtlai District Jail a tlawh

Legal Services Authority hotu in
Lawngtlai District Jail a tlawh
Mizoram State Legal Services Authority (SLSA) patron -in- chief, Gauhati High Court chief justice Justice Vijay Bishnoy chuan Inrinni khan District Jail Lawngtlai tlawhin ‘Special Campaign for Old Prisoners & Terminally Ill Prisoners & Skill Development’ a hmanpui. Mizoram SLSA executive chairman, Gauhati High Court judge Justice Michael Zothankhuma leh Gauhati High Court judge Justice Nelson Sailo ten an tawiawm.
Chief justice chuan mitin tan rorelna dik awm turin national, state leh district -a Legal Services Authority ten kawng hrang hrangin hma an la thin a, Legal Aid Program chu a laimu leh pawimawh ber zing ami a ni tih a sawi. India rama jail zawng zawngah ‘Skill Development and Enhancement Programme’ kalpui a ni tawh tih sawiin, “Hei hian a tum ber chu, jail tangten eizawnna tlak thiamna an neih bakah jail atanga an chhuah huna nunphung pangngaia an khawsak theihna tur a ni,” a ti.
Mizoramah he campaign tha leh felfai taka kalpui a nih avanga jail tang mek leh chhuak tawhten hlawkna tam tak an hmuh kawngah Mizoram SLSA leh DLSA hnathawh fakawm a tih thu a sawi a ni.
National Legal Services Authority-in ‘Special Campaign for Old Prisoners & Terminally Ill Prisoners’ a kalpui chhan ber chu, kum 70 leh a chunglam bakah tihdam theih loh natna neite jail atanga a hmalama an chhuah theih dan kawng ngaihtuahpui a ni tih Justice Vijay Bishnoy hian a sawi a. Jail atanga chhuah nghal theih an nih loh pawhin, an dikna chanvo zah sak leh duat taka enkawl chu he campaign tum ber a ni tih a sawi.
‘Special Campaign for Old Prisoners & Terminally Ill Prisoners’ hnuaiah state leh district level-ah team din vek tawh a ni tih a sawi a. Kum 70 leh a chunglam bakah tihdam theih loh natna veite zawn chhuah bakah tul dangah hma lak a ni a. District unit-te chu probation officers, after-care officers, welfare officers emaw NGO- te nen thawhhona tha tak neih a tul tih a sawi bawk.
District Jail Lawngtlai bikah tang mek zingah kum upa tak leh tih dam theih loh natna nei an awm lo chu lawmawm a tih thu chief justice hian a sawi a. Jail chu misual dahkhawmna hmun anga ngai lo tur leh nungchang siamthatna hmun pawimawh tak, khua leh tui tha taka siamna hmun ang zawnga thlir thiam turin a chah.
Justice Michael Zothankhuma pawhin Mizorama jail hrang hrangah inenkawlna felfai tak kalpui a ni tia sawiin, jail tangten kutthemthiamna an neih theihna atan program chi hrang hrang kalpui thin a ni tih a sawi. A bikin Central Jail Aizawlah huan/ thlai enkawl, vawk leh ar vulh, lu meh, thing mistiri hna, computer zirna leh a dangte kalpui mek a ni tiin, skill development chu chak zawka kalpui zel a nih tur thu a sawi.
District Jail, Lawngtlai hi jail tang mi 90 awm theihna tura duan niin, tunah tang 36 an awm mek a ni.