Lehkha chhiar rei record siam

Osogbo, Nigeria a cheng Samson Ajao, kum 27, chuan chawl lovin, a riin darkar 215 lehkha a chhiar char char a, Guinness World Record a siam. Darkar khat lekin ni kua a chhiar tling lo deuh a ni. A hmaa hetiang record chu 2022-a Rysbai Isakov (Kyrgyzstan) siam niin, darkar 124 a chhiar ve thung.
Hetiang record siam tur hian a riin, midang hriat theih ngei tura chhiar a ngai a, an lehkha chhiar kar lakah second 30 aia rei chawlh theih a ni lo. Samson hian a record siam nan hian lehkhabu 100 vel a chhiar man a, a subject pawh a zau khawp mai finance, sales, management, leadership, politics, health leh rilru hrisel lam te pawh a tel. A record siam hi Nigeria-a lehkha chhiar miin an uar lehzual theih nan a tih niin a sawi.
A lehkha chhiar chhung hian darkar khatah minute 5 zel chawlh a nei thei a, a chawlh neih hi a khawl thei bawk a, nikhatah darkar 2 chawlh a khawl tling thei tihna a ni. He chawlh a neih hi ei leh in, bathroom kal, inthlak leh intihfai leh mut nan a hmang thei. Record siam tura a inpuahchahnaah Samson hian damdawi lam thiamte pawh a rawn a, a lehkha chhiar chhunga a aw chhang tur veng thei tur leh inthiar deuh sek ngai lo tur chu ei leh in tur tha te pawh a zawng lawk vek a ni.