Lehkhabu thlirna: MAL Book of The Year 2022 DAIDANNA BANG PHENA THURUK

By Rinfela Zadeng
April ni 26, 2023 -ah hian Mizo Academy of Letters (MAL) chuan, an pawl din champha lawmna hunah kum 2022 chhunga Mizo tawng lehkhabu chhuak zinga tha bera an thlan ‘Book of The Year 2022”, chu ‘DAIDANNA BANG PHENA THURUK’ tih lehkhabu ziaktu Zohmangaihi hnenah an hlan dawn tih kan hre vek awm e. MAL Book of The Year 2022 ‘DAIDANNA BANG PHENA THURUK’ hi tun tumah hian kan belchiang dawn a ni.
A ziaktu chanchin tawi
Zohmangaihi hi Mizo nu chhuanawm tak niin Aizawl Theological College atangin BD leh M. Th (Theology) a zir zo a. Chumi hnu kum 2019 khan Doctor of Ministry hi South Asia Theological Research Institute/SATHRI atangin a zo leh a; Dr. Zohmangaihi tiin kan sawi thei a nih chu. Ecumenical Christian Center/ECC, Bangalore-ah Lecturer hna a thawh hnuin Samaritan Society of Mizoram-ah Councellor hna a thawk leh a. Presbyterian Church of India General Assembly-ah Secretary for Women Relations hna hi kum riat (2009-2017) a thawk a. Kum 2018 – ah All India Sunday School Association-ah Regional Secretary (N & NE) a thawk leh a. Kum 2019 – 2021 chhungin Council for World Mission hnuaiah Tahan Theological College, Myanmar-ah Theology Dept-ah zirtirtu hna a han thawk leh a. Covid – 19 avanga khawvel a buai avangin Tahan atang hian lo hawin Missionary Training College/MTC, Mission Vengthlang, Aizawlah zirtirtu hna a thawk leh a. Kumin 2023 April thla atang hian Mizoram Synod tirhin North East India Christian Council/NEICC hnuaia Peace Center-ah Programme Coordinator hna a thawk mek a ni.
Lehkhabu chanchin
He lehkhabu ‘DAIDANNA BANG PHENA THURUK’ hi Gilzom Offset kutchhuak niin, thuhmahruai te nena chhiarin phek 214 -a chhah a ni a. Lehkhapuan tha pangngai taka chhut niin chhiar a nuam hle a. October 2022 a chhuah niin thla khat chhung lekin copy 1000 hralh zawh nghal a ni a, cheng zahnih (Rs 200/-) man a ni. He lehkhabu a chhuah atanga thla khat hnu November 2022 khan chhut nawn leh a ni a. Tunah hian Book of The Year 2022 a nih tak avangin chhut nawn leh a ngai ngei bawk ang.
A chhunga thu awmte
He lehkhabuah hian thupui sawmthum pakhat/31 a awm a; a ziaktu lehkhabu rawnte a tel bawk. He lehkhabu ziaktu hian a tir lamah a chanchin tlem tarlangin Israel/Palestina rama zin a chak thin thu te leh Pathian thu a zir dan chanchin te ngaihnawm takin min hrilh a. A ziaktu chanchin ringawt pawh hi zirtham leh entawn tur tam tak awm a ni nghal bawk. Pathianin a duhthusam pein ‘Ram Thianghlim’ kan tih mai Israel/Palestina rama a zin dan leh Israel/Palestina rama a tawnhriatte he lehkhabuah hian kan hmu a ni.
Thlir dan tharin Israel ram
Mizote leh Sap zingah pawh Israel ram chanchin an ziah hi kan chhiar fo tawh ang a; Bible atanga kan hmuh angin Israel te chu Pathian hnam thlan leh Kanaan ram luah tura Pathianin Abrahama atanga Mosia – Joshua kaltlanga a kohchhuah te an nih thu kan hmu a. Chung avang chuan Kristiante leh Mizote zingah Israel-te tan tlatna leh duhsak bikna, Israel/Palestina ram pawh an ta tura ngaihna leh Israel ram fan chakna a bual Mizote kan ni a. Israel hnam bo zinga awm chaka pem thla hial kan ni tih te pawh kan hre awm e. Chung avang te chuan Israel hi ram nuam leh ram ropui, Lal Isua Krista te ram leh khua a nih avanga ram nuam leh muanawm, remna leh muanna, van ram te nau ang hiala kan lo ralkhat hriatna chu a lo ni miah lo tih he lehkhabuah hian chiang takin kan hmu a. Chu Israel/Palestina ram dinhmun dik tak pakhat tarlan a nihna chu he lehkhabu hlutna pakhat hi a ni.
Kristianna leh Israel ram
Khawvela Sakhaw ropuite zingah Kristian te hi kan tel a; Pathian nung betu leh Pathian awm ring lo te pawhin an chai ber Pathian neitu, Lal Isua Krista hnungzui tu kan ni a. Lal Isua Krista lo chawrchhuahna ram leh khua chu Israel ram niin Lal Isua pawh Israel hnam zinga pakhat Juda hnam a nih kha. Mahse chu Kristian sakhaw bul lo intanna ram Israel ram chu tunah hian ram chhunga indona leh innghirnghona, Palestina mite nena inep reng mai, daidanna bang sang pui pui hunga khawvel mite hriat khawpa rorelna lai lo (unjustice) lekkawhtute an nih thu he lehkhabuah hian kan hmu a. Kristian Sakhua chuan a lo chawrchhuahna Israel ram kalsanin Khawthlang leh Europe – ah te bu a khuar a. Mahse a lo pianchhuahna ramah chuan Lal Isua Krista sulhnu chauh awmin a ram mipuite nun danah chuan Kristianna hi sum dawnna atan chauh an hmang emaw ni tih theih turin vawiinah hian Israel ram chu a awm mek a ni tih he lehkhabuah hian kan hmu a. Chuvang chuan Kristiante hian rilru thar leh thlir dan thar (new perspective) a Israel te hi kan thlir tulzia leh kan ngaihpawimawh a tul zia he lehkhabuah hian kan hmu a ni.
Zinkawng lehkhabu ngaihnawm (Travellogue)
Ram hrang hranga zin kual thinte’n an zinna ram chanchin lehkhabua an ziah ngaihnawm tak tak hi kan chhiar fo tawh ang a; Mizote ziah ngei pawh kan chhiar fo tawh awm e. He lehkhabu pawh hi chutianga Israel rama zin chanchin ngaihnawm tak lehkhabu a ni a. Hetianga khualzinna ram chanchin lehkhabuin ‘Book of the Year’ lawmman a la thei hi a ropuiin Mizo thu leh hla huangah pawh bung thar kan kai niin a lang a, a lawmawm takzet a ni. Hetianga ram dang chanchin kan lo hriat dan ni lo zawnga ziah lehkhabu kan nei ta hi a hlu a. Kan lo hriat dan leh kan lo beisei dan phena thil tak tak awm te hmanga Israel/Palestina ram chanchin min han hrilh hi he lehkhabu hausakna leh Mizote’n Ram Thianghlim kan hriatna tihausatu a ni tiin kan sawi thei awm e. Keima mimal ngaihdanah phei chuan Sap tawnga lehlin hial ni se, khawvel hriatah pawh a zahpuiawm lohin ka hria.
Hmeichhia te kan nep lo
Kum 1989 atanga ‘MAL Book of The Year’ an thlanchhuah tawh zingah hmeichhe kutchhuak, Book of The Year ni thei hi pali chiah an la awm a. Chung zinga pakhat chu tuna kan sawi mek ‘DAIDANNA BANG PHENA THURUK’ hi a ni a. Mizo hmeichhiate hi kan nep bik lo a, kan tum phawt chuan a chung berah kan awm thei a ni tih a langchiang hle. He lehkhabu hlu tak ziaktu Zohmangaihi pawh hian tan lo la zel se la, lehkhabu tam tak lo ziak zel teh se. Mizo hmeichhiate pawhin amah hi entawn ila, Pathian rinchhanin engkim hi kan ti thei a ni tih kan inhriatchianna atan he lehkhabu tlawm tak hi i hmang ang u.
Israel ram leh Israel fate chanchin hi Bible atangin leh Israel ram lo zin tawhte hnen atangin kan hre ve fo a. Vawiin khawvelah hian Israel fate leh an ram dinhmun dik tak te, Lal Isua Krista lo chenna ram leh khua hi eng ang tak nge a lo niha eng thuruk nge awm tih hre turin he ‘DAIDANNA BANG PHENA THURUK’ hi lo chhiar ve la. Kawng khat talin hriatna leh finnaah hma i sawn ngei ang tih hi ka sawi ngam e.