Lehkhabu ziak zo rang record siam

Nalbari College, Assam-a B.Sc (Botany) zirlai Rajdeep Kashyap, kum 19, chuan Guinness World Records, lehkhabu ziak zo rang ber record a siam a, darkar 9 chhungin lehkhabu, phek 84 a chhah a ziak hman.
Arangamow thingtlang khua, Nalbari district a seilian, Rajdeep hian Assamese-in lehkhabu “Jonmo- Prem- Mrityu, Kisu Bogyanik Kisu Aaloukik” (Birth- Love- Death, Some Scientific Some Supernatural) tih chu darkar 9 chhungin a ziak zo hman a ni.
Rajdeep hian record a siam a tumna kawnga harsatna a tawk a, mahse, an college princpal zarah record hi a siam thei ta a ni. Rajdeep chuan, “Guinness hotu ten lehkha ka ziak lai, a tir atanga a tawp thlengin video evidence an duh a. Mahse, kan awmna thingtlang khaw kilkhawr atang chuan connectivity lamah harsatna kan neih avangin darkar 9 livestream te chu a tihngaihna a awm ve lo. Chutiang harsatna kan neih avang chuan ka thil tih hi a nem nghet turin district commissioner emaw college principal emaw an phut ta a, kan principal-in approval letter min ziah sak ta a ni,” a ti.
Rajdeep chuan Jharkhand-a hmeichhe pakhatin ni thum chhunga lehkhabu a ziah zawh avanga record a siam chungchang a hriat hnuah record hi siam ve theih inringin a bei ta niin a sawi a, “A tirah chuan ka theih dawn leh dawn loh ka chiang bik lo a, mahse, tih ve hrim hrim ka duh a, tichuan hei Guinness World Records bu-ah hming kan ziak ve ta a nih hi,” a ti.
He lehkhabu hi tlangzarh a la ni lo va, mihring nun, hmangaihna leh thihna chungchanga philosophy leh scientific zawnga thlirna a ni. Rajdeep hian May ni 24, 2024 tlai dar 4 atanga ziak tanin, May ni 25 zing dar 1-ah a ziak zo a, “Zanriah ei nana darkar chanve ka chawl tih loh chu dawhkan ka thawhsan lo,” a ti.