Lei hnuai tui siak theihna dan ennawn turin CESJ-in a ngen

Lei hnuai tui siak theihna dan
ennawn turin CESJ-in a ngen
Lei hnuai tui siak chhuah theihna dan awm mek chu tui hna kangchat zelah a him tawk tawh loa hria in Centre for Environment & Social Justice chuan he dan hi ennawna siamthat a nih theihnan hma la turin PHE minister an ngen.
CESJ-in PHE minister hnena ziakna rawtna leh ngenna an thlenah, Mizoram hmun hrang hranga leihnuai tui lak/ verh /siak chhuah avanga harsatna tawk mekte vuivaina an dawn tam avanga The Mizoram Ground Water (Control and Regulation) Act 2023 leh a Rules 2024 an bihchiannaah, he danah hian Mizoram dinhmun nena inhmeh lo leh tha tawk lo, duhthusam lo, siamthat ngai a awm nualin an hria tih a sawi.
Heng rawtna an thlen ngun taka zirchiang a, he Act leh Rules that tawk lohna lai, siamthat ngai siamtha tura hma lak a nih chhung chuan leihnuai tui lak/ verh phalna leh registration thar pechhuak tawh rih lo turin an ngen nghal tih a sawi a ni.
‘Khawvel ram hrang hrangah tui harsatna (world water crisis) rapthlak tak a intan chho mek a. Tui awmna thin, lui/ dil/ tuikhur tui tlan tur awm loa a kang ro char vek (Day Zero) a tam tawh hle. Tui hna kam zel chhan hi mit ngeia hmuh theih ni lo mah se, ruahtui tlak dan mumal lo leh vur tuiral a tlem vang ngawt a ni lo tih a chiang a. India ram lui pawimawh, Ganga kam chak chhan ber zaa 50 – 70 vel chu lei hnuai tui lakchhuah nasat vang a ni mithiamte hmuh chhuah kan pawm a ni,’ CESJ hian a ti.