Lei paihna atana hman thin titawp

Lei paihna atana hman thin titawp
Aizawl Municipal Corporation chuan Republic Vengthlanga Saiziki ram, ITI Veng huamchhunga leivung paihin Chite lui a thleng tih hria in hma a la a; tihtawpna order chhuahin, leivung leh in sak/ thiahna hnawk paihna atan hman tawh loh turin a ti.
Hemi ngaihtuah hian Nilaini khan Aizawl mayor Lalrinenga Sailo hoin AMC hotute, Save Chite Lui aiawh leh Aizawl DC aiawh bakah official dangte an thukhawm a. Saiziki rama leivung paih vanga Chite luia leivung lut hi paihfai turin a neitu hriattirna pek a ni.
AMC thuchhuak chuan, Aizawl khawpui a than chak avangin leivung tihchhuah pawh a tam a, a paihna hmun a awm loh chuan kawngsir leh hmun remchang laiah a ruka paih an awm thin a, hei hian harsatna tam tak a thlen thin tih a sawi. Local council zawng zawng hnenah an huamchhunga leivung paihna hmun zawng tura hriattir niin, AMC hian Search Team dinin, leivung paihna hmun tur hmun hrang hrangah a zawng tawh thin a. Aizawl Smart City Ltd. pawhin leivung paihna hmun tur Khatla Veng-ah a siam mek tih a sawi a ni.
AMC-in license a pek hmunah chauh leivung hi paih theih a ni tih sawi nawnin, tun dinhmunah leivung paihna hmun 7 a awm. Leivung paihna hmun hi AMC chuan uluk zawkin a vil zui dawn a, dan an bawhchhia a nih chuan na takin hma a la zel dawn tih a sawi.
Leivung leh bawlhhlawh paih ruk thinna hmunah CCTV dah turin AMC leh Aizawl Smart City Ltd. chuan ruahmanna a siam a, a dahna hmun tur enfiah a nih tawh bakah AMC chuan hmun pawimawh bikah a ranglamin CCTV a dah dawn tih a sawi bawk.
Dan bawhchhia mante chu an phu tawk hremna pek thin an ni a, mi tupawh dan bawhchhia hmu chuan rang takin AMC-ah hriattir turin mipui an ngen tih sawiin, thlalak emaw video emaw nen Ph No. 8575561415 ah whatsapp-a report turin a ngen.