Lei tawlh vanga leilet neite harsatna sutkian dan tur rel

Chirh leh lei tawlh vanga Serchhip Zawlpui Lumtui Zaua loneitute harsatna tawh dan leh a sutkianna tura hma lak zel dan tur chu district bawrhsap Paul L Khuma hoin Thawhlehni khan ngaihtuah a ni.
Kawngpui laih zauin a nghawng kalzelah furpui a lo thlen tak bawk avangin, spoil bank atanga chirh leh lei tawlhin Zawlpui leilet a tichhe nasa hle a. Bawrhsap pisa kaihhruaiin kumin July 16 khan leilet hi a hmunah enho a ni tawh a. Hemi tuma an thutlukna bawhzui a nih dan chu tun tumah hian sawi ho a ni.
Contractor leh NHIDCL hotuten hma an lak dan an sawi a. Hma an laknaah duhkhawp lohna a la tam avang leh leilet neitute harsatna chinfel a la nih loh avangin, August 5 hian leilet hmun chu bawrhsap pisa kaihhruaiin enho leh tum a ni.
Thutkhawmah hian district administration hotute bakah NHIDCL leh an hnuaia contractor KRAM Infracon hotute, leilet neitu aiawh Lumtui Field Management Committee hruaitute an tel bawk.