Leiba ngah state nih sawiin dawt sawi angin min bei let – ZPM leader

On Oct 4, 2023 7 0

India rama leiba ngah ber state kan ni tih sawi chu, dawt sawi ang lek leka beilet duh an awm zel tih ZPM leader Lalduhoma chuan a sawi.
October 2-a ZPM Tawi East Block Conference Saituala neih a hmanpuinaah Lalduhoma chuan India rama leiba ngah ber state kan ni tih an sawi thin chu dawt sawi ang lek lekin an beilet duh zel, tia sawiin, “Chhiarkawp dik lo hmanga kan leiba zat mipui hnena hrilh hi keini chuan dik lo kan ti a. Sawrkar kalphung duh khawp lohna kan sawichhuah hian midang sawisel leh sawichhiaah min ngai thin a, sawrkar kalphung dik lo mipui hnehah kan hriattir zawk a ni,” a ti.
Tunhnaiah sawrkarin school tam tak a upgrade chu an lawmpui rualin, inthlan dawn tepa an ti chauh an ti thin chu mak a tih thu a sawi. “Tunhma pawhin hetiang tho hian an lo ti tawh a, hma an la zui hleithei si loa, khawtlang rilru tinatu leh sawrkar leh tur tan phurrit siamsaktu an lo ni tawh thin. Vote zawn nan ringawta mipui dawi kual hi sawrkar tha zia a ni lo,” a ti.
ZPM a sawrkar chuan chief minister-in works deparment a chan ve dawn loh avangin MLA-te bial a theihtawpin a vilpui ve dawn tih ZPM chief ministerial candidate Lalduhoma hian a sawi a. Chuvangin ZPM MLA candidate an lo vote hian CM tur in vote tel nghal zel tih a sawi. India rama HIV kai tamna, ruihhloa thalai tam tak tlan na, kan pung muang em em leh thalai thi kan tam em em te, nupa inthen kan tamte chu politics nena inkaihhnawh vek nia sawiin, “ZPM a sawrkar chuan heng siamtha turin hma kan la dawn a, kan budget pawh helamah hian a tul ang angin thalaite chhanchhuah nan leh vantlang nun tha lo siamthat nan hman a tul dawn a ni,” a ti.
Kristiante tan BJP sawrkar a him loh em em lai a, sangawi zawnpuitu, BJP sawrkar leh tir tumtu pawla MNF a tel chu pawi a tih thu a sawi a. Amah pawh national party Mizoram Congress president ni tawh a, central-a an hotuten control an tum zia hrechiangtu a ni tih sawiin, tualto party ZPM, central-a zawm nei ve lo leh hlauh nei ve lo tur nih chu an inchhuanna pakhat a ni tih a sawi a ni.