Leimin vanga harsatna tawkte tan ruahmanna siampui dawn

Vaivakawn huamchhung, national highway pawhtu leiminin a chhehvela chengte a nghawng dan leh harsatna an tawh mek sutkian theih dan turte chu Inrinni khan bialtu MLA, minister Lalruatkima hoin a kaihhnawih sawrkar department leh khawtlang hruaitute nen en a ni.
He leimin avang hian Vaivakawn Zohnuai chuanhnuaia vengchhung inkalpawhna a chhia a, leiminna atanga hmarlama cheng chhungkaw 20 velin kawngpui pawhtu chakkhai lakna tur leh veivahna tur kawng mumal an neih loh avangin harsatna an tawk mek. Minister ho hian helai hmuna chengten awlsam taka kawngpui an pawh theihna tur kawng awm theite dapin NH-6/306 (Hunthar – Vaivakawn, Sairang Road) atanga kawng siam dan tur a hmunah an en. A kham ko a san avangin thutlukna siam nghal mai harsa an ti a, PWD (Highways) hotute nen a rang thei ang bera thutkhawma ruahman ho nise tiin thu an dah.
Vaivakawn Zohnuai (Ropaiabawk Peng) Vaivakawn thlanmual bul hi June 16 zing khan nasa taka minin, a thlang kawngpui NH 6/306 chu hun engemawchen a hnawhping a, chhungkaw 16-in an chenna luah ngam loin an chhuahsan tawh.
Aizawl Municipal Corporation pawhin July 11 khan thupek chhuahin, Vaivakawn Zohnuai lei chetna chhehvela in sa mek leh la sa turten khawl (heavy machinery) leh nghawr siam thei hman a khap a ni.