Leiverha tangte lak chhuah tumnaah hma sawn lo
Leiverha tangte lak chhuah tumnaah hma sawn lo
Nagarkurnool, Telangana-a Srisailam Left Bank Canal (SLBC) leiverh chima engineer pahnih tela thawktu pariat tang mekte chu chhanchhuah tuma hna thawh mek zel a ni a, hma erawh an la sawn thei lo.
Indian Army, Navy, NDRF, GSI leh agency danga thawktute chuan chhun zan zawmin an thawk a, tui leh lei leh lung tlain a hnawh nasat em avangin an thawk sawt thei lo hle a, thawktute tan pawh a him lo hle niin news agency ANI chuan a tar lang.
Thawhlehni khan Telengana Irrigation Minister Uttam Kumar Reddy chuan thawktuten SLBC leiverha chhanchhuah hna thawh chu khawvela hautak ber a tling tih an sawi tih a sawi a. Leiverh hian luh leh chhuahna pakhat chauh a neih avangin a khirh hle tih a sawi.
A chim chhan hi a innghahna lei a tawlh vang leh lei che a awm vang niin an ngai tih a sawi.
“Kan buaina ber chu lei leh tui lut chak lutuk hi a ni a. Mi thiam thenkhat chuan chhanchhuah hna thawktute tan pawh a hlauhawm tih an sawi a. A mawhphurtu sorkar kan nih ang ngeiin ngaihdan tha ber lain kal zel dan tur tha berah kan kal zel ang,” a ti.
Inrinni tuka chhiatna thlenna hmuna hna thawh hian hma a sawn chak lo hle a. Minister Reddy chuan a tih theih dan hrang hrang dap a ni tih a sawi a, heng zingah hian leiverh chung leh sir aTanga verh pawh sawi a ni a, thawktute himna erawh ngaihtuah zel a ni dawn tih a sawi.
Reddy-a hian phone-in Border Security Force General Harpal Singh biain technical thila a tawnhriatte thawh turin an sawm tih a sawi.
Nagarkurnool District Collector B Santhosh chuan tui paih hna thawh reng a ni tih a sawi a. “Tun thleng hi chuan tangte hi kan la bepawp thei lo va. Geological Survey of India leh mi dang aTangin ngaihdan kan la a. Tui hi paih reng mah ila a tawp metre 40/50 vel kan lut thei lo,” a ti.
Rescue team-te hian tunnel boring machine (TBM) thleng an kal thei a; mahse, a bak metre 40-50 chu hnawh vek a ni tih a sawi bawk.
Hmanraw dang leh Tha zawk nen rescue team hi an lut leh a, a daltu hi paltlanga mi tangte biakpawh leh an tum dawn a. “An tum ber chu daltu metre 40 vel hi kal pelha a chhunga awmte biak a ni,” a ti.
Nagarkurnool Superintendent of Police Vaibhav Gaikwad chuan tang mekte himna chu an ngaih pawimawh ber a nih thu a sawi a. Leilung thiamten lei sample an la a, heta tang hian hmalak zel dan tur pawh hriat theih an inbeisei tih a sawi.