Leivung paih dan fimkhur loh vangin luia nungcha an thi tam

Leivung paih dan fimkhur loh
vangin luia nungcha an thi tam
Lunglei district huamchhunga National Highway 302 kawng laih mekah kawng sialtu NHIDCL leh an hnuaia contractor-ten leivung paih dan fel tak an neih loh avanga luia leivung tawlhlut nasa chu tunhnaia ruah bawhawk surah Hauruang khawtlangin Ruangte luiin a tuar a, lui sa an thi nasa hle tih sawi a ni.
Lunglei atanga thudawn danin, Hauruang khawtlang hian kum 20 chuang ngawrh takin Ruangte lui hi an lo humhalh tawh a. Tunhnaia ruah bawhawk surin leivung a len luh nasat avangin luia nungcha an thi nasa hle niin Hauruang YMA hruaituten an sawi.
He thil thleng hi hriat a nih veleh YMA Hauruang Branch hruaitute, khawtlang mipui leh Lungleia Forest department chu a hmunah kalin thil thlen dan an enfiah a. He thila a mawhphurtu ber nia ngaih NHIDCL lakah Hauruang khawtlangin dan angin zangnadawmna an ngiat a ni tih YMA hruaitute hian an sawi.