Lengpui Airport bulhnaia IAF-in ram an lei danah hlauhthawn nei
Lengpui Airport bulah Indian Air Force (IAF) in mimal 7 hnen atangin an ram (LSC 8) a leisak a, chhan hrang hrang avanga IAF kuta airport hlan duhlotu pawl chuan he thil hian an ngaih a titha lo hle tih an sawi.
Lengpui Airport Forum sawi danin, tunhnai khan IAF hian Lengpui Airport bulah leh Sihphirah Mizoram sawrkar kaltlangin mimal ram an la/ lei a, Lengpuiah hian mimal 7 ram, LSC 8 leisakin, a vaiin square feet 4790880.16 a ni. Sihphirah hian mi 8 hnen atangin LSC 8 huamchhung ram leisakin, a vaiin sq.ft. 218,409.839 a ni a, heng hmun pahniha ram an lei zau zawng hi sq.ft. nuai 50 chuang hret a ni.
2023 December 13-a ni 100 chhunga sawrkar ngaihpawimawh tur zingah – ‘Airport Authority of India (AAI) kuta Lengpui Airport hlan’ tih a tel laiin, kum 2024 hnulam atang chuan IAF kuta airport hlan a nih theihnan sawrkarin hma a la zui ngar ngar a. Kumin March-a Union Home minister rawn kal tumin NGO Coordination Committee-in IAF kuta hlan an duh loh thu leh AAI kuta hlan an duh thu an lo thlen angin, Union minister hian AAI-in a enkawl tur thu leh thla thum chhungin ruahmanna an peihfel anga, thla ruk chhungin airport tih changtlun hna an tan tur thu a hrilh tih an sawi.
Hemi hnu, April thlaah pawh Working Committee chairman chuan thuthar thehdarhtute zawhna a chhannaah IAF kuta hlan dan tur chu buaipui chhunzawm zel a nih thu a sawi laiin, hemi thla vek hian AAI hotute chuan airport tihchangtlun dan tur an rawn enfiah bawk tih an sawi a ni.
RTI-a zawhna chhannaah sawrkarin AAI kuta airport hlan tura hma a lakna sawi thui tur a awm loa, kumin July 7-a chief minister-in Union Home minister a hmuhnaah, AAI hnena Lengpui Airport hlan chungchang chu Union cabinet-a an lo ngaihtuah tur thu a hrilh tih leh, July 27-ah Working Committee-in Lengpui Airport thawmthat leh enkawl kawnga hmalak dan tur an rawt chu sawrkara thehluh a la ni lo, tih bak hriat zui a ni ta lo tih Lengpui Airport Forum hian an sawi.
Mizoram sawrkarin AAI nena inbiakfel a hmanhmawh lo hle nia a lan lai a, IAF tan Lengpui Airport atanga hnaite, hmar lama cheng vaibelchhe vaibelchhe za chuang senna tur ram a laksak lawi si chu an ngaih a tha loa, hetiang ‘case’ nei Nagaland pawhin rang takin AAI kuta hlan turin a tifel thei tih an sawi a ni.