North East Special Infrastructure Development Scheme (NESIDS) sum hmanga Lengpui Airport tihchangtlun hna thawh mek chu DoNER minister hriattir angin kumin October-a zo tura tih an ni.
Sawrkar laipui programme pawimawha Mizorama rawn kal Ministry of Development of North Eastern Region (DoNER) a minister of state BL Verma chuan Lengpui Airport a tum veleh a hmunah a en a. Airport VIP Lounge-a thutkhawmah Union MoS leh amah zuitu DoNER ministry-a joint secretary leh director ten state PWD leh GAD (Aviation Wing) hotute chu he hna thawh meka thil pawimawh hrang hrang zawtin, zawhfel a nih thuai theih nan ruahmanna an sawipui.
He hna hi 2023 December 4-a zawhfel turin a hun pawhsei ni mah se, Union MoS-in kumin April 11-a helai hmun a tlawh tum khan kumin October-a zo tawh tura hma lo la turin a lo hrilh tawh a; tun tumah hian Union MoS chuan ngawrh taka theihtawp chhuaha October ralhmaa he hna hi zawh ngei nise, tiin a duh thu a sawi nawn.
PWD leh GAD (Aviation Wing) hotute chu he hna hi Airport tihchangtlun hna dang SASCI sum hmanga thawh mek nen a kalkawp avangin a bikin electrical hna chungchang chu duh anga chak taka thawh leh hma lak a har thu an lo thlen a ni.
Union MoS chuan Lengpui Airport tihchangtlun hna hrang hrang – elevated road, departure lounge, baggage make up area leh a dangte a fangkual a ni.
NESIDS sum, nuai 1959 hmangin he hna hi thawh mek a ni a, tunah hian hna – civil works zaa 88 leh electrical works zaa 68.31 zawh tawh a ni.
Lengpui Airport cheithat October-a zo turin hrilh
Get real time updates directly on you device, subscribe now.