Kutthemthiamte pui thei tur central scheme thar hawng

India ram puma kalpui tur PM Vishwakarma Scheme chu Pathianni khan Vishwakarma Jayanti leh Prime minister pian champha vawi 73-na pualin ram chhung hmun hrang hrang 70 chuangah hawn niin, Mizoramah chuan he scheme kalpui tur puala hman hi DoNER minister BL Verma chuan a hmanpui.
DoNER minister chuan langlo lama tangkai taka ram tana hnathawktu kutthemthiam, thiamthil hrang hrang neite hmalakna ropui a tih thu sawiin, an hmalakna chawisanga ram tana an hnathawh hriatpuina leh tihchangtlunna tur scheme duan a ni chu lawmawm a tih thu a sawi. Hemi kalpui tur hian sawrkar laipuiin cheng vaibelchhe 13000 a ruahman thu leh ministry pathumin an kalpui dawn thu a sawi a. Hemi hnuaia hamthatna dawngtu Vishwakarma-te chu sum leh paia tanpuina, training & stipend, hmanraw leina tur Rs. 15000 thleng leh an thil dehchhuah hralhna thlenga ngaihtuah sak tum an ni tih a sawi. Dahkham ngai loin loan pung tlem cheng nuai 3 thleng a lak theih dawn a, chhawmdawlna dangte pawh pek an ni dawn a, hei hian nasa taka puiin an tan kawng zau tak a hawng thei dawn, tiin a sawi a ni.
Pipute hun lai ami kutthemthiamna chhawmnung zelte tuamhlawm chu ngaihpawimawh a ni dawn tih BL Verma hian a sawi a. Mahni kutkawiha thil siamchhuah tih changtlun leh zawrh thlengin a pui thei dawn a; thingtlang leh khawpui tuam chhuah vek tum a ni tih a sawi a ni.
DoNER minister bakah hian Mizoram I&PR minister Lalruatkima leh chief secretary Dr Renu Sharma ten thu an sawi a. DoNER ministry official-te, state sawrkar official-te, kutthemthiamnaa eizawng leh sawm bik dangte an tel a ni.
# PM Vishwakarma Scheme hian mahni kutkawih leh hmanraw neih angte tangkai taka hmang a, kutthem thiamna hrang hrang neite hmalakna hriatpui leh chhawmdawl hna a thawk dawn a. An thil dehchhuah hlutna tisang tur leh MSME (Micro, Small & Medium Enterprises) value chain nen thlunzawm theiha duan a ni.
# A bultanna atan cheng vaibelchhe 13000 ruahman niin, traditional trade 18-ah kalpui a ni dawn. # Ministry of MS&ME chu nodal dealar a ni a; beneficiary zawn chhuah, thiamthil tipung tura training pek, sum leh pai tanpuina pek leh an thil siamchhuah hralhna tur ngaihtuah thleng a huam a ni.
# Hamthatna dawng theite chu PM Vishwakarma portal-ah biometric hmanga inziahluh theih niin, PM Vishwakarma certificate leh ID card pek an ni anga, scheme hnuaia hamthatna awmte an dawng thei ang.