Lengpui Airport enkawltu thar zawng tur Working Group din

Enkawltu dang hnena Lengpui Airport hlan chungchang sawiin Nilaini khan chief minister hoin sawrkar mi pawimawhte an thukhawm a. Mizoram tana tha ber tur zawnga enkawltu tur hi thlan a nih theih nan bawhzuitu tur Working Group din nise, an ti.
India ram hmun danga airport engemawzat, Airport Authority of India (AAI) kuta awm mekte an enkawl zui dan leh private company ten (PPP mode-a) an kuta awm an enkawl dan sawi a ni a. Chu’ngte ngaihtuah chung chuan AAI hnenah nge private company hnena hlan tha zawk dawn a, Mizoram tana hlawk ber tur enge ni ang, tih kil hrang hranga khaikhin tur Working Committee /Working Group din nise, anni’n a ranglama lo umzuiin, report kimchang an neih hunah thutkhawm leh nise, an ti.
Lengpui Airport ram venhim dan tur, Airport hnathawktu pawimawh tuna dah belh nghal ngai nia langte pawh sawi nghal a ni.
Thutkhawmah hian adviser to chief minister (Finance) TBC Lalvenchhunga, Resource Mobilisation Committee vice chairman Haukhuma Hauzel, chief secretary Dr Renu Sharma leh official dangte an tel a ni.