PC Laldinthara
President, MIMA
-- Advertisement --
Tunlaiin Lengpui Airport hralh tumna chuan sawi a hlawh hle mai, hemi chungchang hi ngawihpui tum mah ila, chhunglam turna a na sawt hle mai a, chuvangin ka ngaihdan leh hriat ve dan ka lo au chhuahpui ve tawp mai a ni. Uluk takin lo chhiar chhuak ula, lo ngaihtuah chhunzawm teh u.
Kum 2022 kumtir, ni 21st January, 2022-a sorkarin a din Mizoram Resource Mobilization Committee (MRMC)-ah MIMA President ka nihnain Committee Member-a min ruatna appointment, ni 24th January ah ka hmu nawlh mai a. Hetiang Mizoram tana Committee pawimawh lutuk maia Committee member ka ni chu ka insit viau chungin ka lawm hle bawk. MRMC hian Mizoram tan 60.79crores teh meuh a thawk chhuak hman a ni. Mipuite khawih lutuk si lo atanga resource mobilize chu a tum ber niin, ruahmanna tam tak thawhkhawm niin kei pawhin kan Committee hmasak ber ni 1st February, 2024 atangin Mizoram tana ka lo vei ve thin, Resources awm thei tur ka thawh ve nual mai. Mahni ram tana thawh chu nuam ve tak a ni. Helam chu sawi vak lo mai ila, tunlaia sawi hlawh tak Airport-ah lut tawh mai ang aw.
Lengpui Airport hi hralha tute emaw hnena thu neihna pe kher lovin, mipuite phurrit siam chuang si lovin Resource mobilize tur hi a tam hle mai a. Lengpui Airport an hawn ni ni 12.12.1998 atang khan revenue awm theihna tur chi pawh ngaihtuah lovin, a kal miah miah mai a. MRMC, 2022 alo din khan committee chuan nasa taka hma lain, MRMC te hmalakna zarah passenger manah ringawt April 2022 – March 2023 chhung ringawt pawhin Rs. 389 lakhs a la lut a. A bak tam tak lakluh theihna tur a la awm a ni.
A nihna ang tak chuan revenue tur ngaihtuahin tang ila chuan a hnuaia mi ang hi India rama lakluhna tur duan sa ang thlap a ni:
1. Passenger hi kar tin mi 4000 nei ang an ni a. Passenger zawng zawng hnenah Rs. 229/- charge tur a ni. Passenger service fee(RSF) hi 4000×229=9,16,000 per week a ni ang.
Journalist senior leh rintlak ber pawl Pu HC Vanlalruata chuan, ni 3.8.2023 a Union Minister for Civil Aviation Jyotiraditya Scindia-a’n, Lok Sabha-a Tamil Nadu MP SR Parthiban zawhna a chhanna rawn la chhuakin, “kum 2022-2023 chhung khan Lengpui tumhmun chuan cheng nuai 389 a la lut a, a sum sen chu cheng nuai 676.91 niin kum khata a sum hloh chu cheng nuai 287.91 a ni a tih thu a sawi a”. Pu Ruata hian nikum April leh kumin March thla inkar chhung khan Lengpui tumhmunah hian lut leh chhuak nuai 4 leh sing 2 chuang an awm thu a sawi bawk. Hetiang hi a nih phei chuan passengers service fee hi a tam ang hlein 4,20,000×229=Rs.96,180, 000/- a tling dawn a ni.
2. LANDING CHARGE: Kartin thlawhna hi vawi 21 tum ziah ang a ni a, vawi khat tumah Rs. 12,435/- lak tur a ni a. Kar tin Rs. 12,435×4=2,61,135+GST per week a ni dawn a ni.
3. ROUTE NAVIGATION FACILY CHARGE (RNFC):
Delhi – 3 flights
Guwahati – 6 flight
Kolkata – 9 flights
Imphal – 3 flights
Agartala – 3 flight
Heng flight atang hian Rs. 1,25,000+GST per week a ni. Tunah chuan Delhi flight a awm teuh tawh. Pawisa lut pawh a tam tawh leh zual ang. Hemi Airport a lakluh dan kan hmuh hi a rei deuh hlek tawh a, passenger hi an tam chho zel a, hemia chhut dan pawh hian kar khatah Rs. 13,02,135 a ni a, thla khat chawlhkar 4 leh kum khata thla 12 a puntirin,kum khat lakluh total hi Rs. 6,25,02,480/- +GST a ni.
Pu HC Vanlalruata Times Of India Correspondent-in tunhnai maia a article-ah passenger lut leh chhuak a ziah dan phei chuan kum khatah passengers ringawtah 420000×228=Rs. 9,61,80,000/- a ni dawn a ni. Pu Ruatan passenger zat a ziah hi a update zawk mai thei bawk.
Heng mai bakah hian Lengpui Airport-ah hian parking fee lak a nia, tun ami bakah hian State danga an tih angin Parking lodge senso sang lutuk si lovin siam sela, zin mite an zin chhung man chawia a dahna tur kalh theihin siam sela, sum tam tak a lut ang. Private siamah open air-ah kan motor man to tak kan han dah thin hi chu uiawm tak a ni.
Hei mai a ni lo. Sorkar Quarters 73 a awm a, a free vekin an luahtira, maintain ngai se Mizoram sorkarin a tum a, vaibelchhe tel lakluhna turah a free-in an luah a. Hei hi quarters an alloted dan chu a ni, a la dik turah ka ngai. Airports Authority of India-25, Airport security unit, MRP- 10, Aviation dept. -14, Air India Ltd. -4, CRPF- 2, City fire- 1, IOCL-1, MET-2, MPRO-1, PHED-1, PWD-8, Vacated -4, Total – 73quarters.
Aviation wing hnena lut tur Restaurant pawh 2 a awm bawkin ka hria. Kum tin 10crores chuang lakluh theih tura thil awmsa reng ngaihthah a nih vangin Sorkarin a lost mai mai a ni. A nihna ang takin kalpui se Senso zawng zawng paihin Mizoram sorkar hian a hlep zawk ngei ang.
Sumdawngte, sorkar hnathawkte, mipuite, damlo leh thildanga tangkai leh hlu em em LENGPUI AIRPORT hi i hralh mawlh lo ang u. MLA zahawm tak, Adviser to CM ni bawk pu TBC Lalvenchhunga Chairman-na, Working Committee to Look into the Maintainance and Management of Lengpui Airport pawhin lo mangnghilh lul lo turin ka ngen a ni.