Lengpui ram hralh sawrkar hmasa huna tihfel vek a ni – Adviser to CM
Lengpui ram hralh sawrkar
hmasa huna tihfel vek a ni
– Adviser to CM
Lengpui Airport bula ram, Indian Air Force hnena hralh chu sawrkar hmasa huna tihfel vek tawh a, ram hralh zangnadawmna a rawn thlen hnua pek chhuah mai a ni tih adviser to chief minister (Finance) TBC Lalvenchhunga chuan a sawi.
Thawhtannia ZPM office-a inkhawmah TBC Lalvenchhunga chuan, IAF hnena ram lei leh hralh hi Lengpui ram chauh ni loin Sihphir ram acre 5 a tel tih a sawi a. He thil hi an sawrkar hma thil niin, amah pawhin Assembly House leh Ignite Studio-a party tin sawihonaah a sawi chhuak tawh tih a sawi. “Sawrkar hmasa huna teh fel leh tih fel vek tawh a ni a. Tun sawrkar hunah zangnadawmna sum hi sawrkar laipui atangin a lo thleng a, pek a ni ta a ni,” a ti.
Sawrkar hnen thleng loa ram hralh theihna DC ‘level’ a a zo vek thei chu mak a tih thu a sawi adviser to CM hian a sawi a. Ram chu ‘direct’ in an lei a, sawrkar thleng loin DC level-ah a zo vek a, tuna IAF ram leiah pawh hian DC level-ah a tawp vek tia sawiin, “Direct purchase a ni a, DC hian collector an nih avanga ‘final’ mai an ni a, cheng vaibelchhe 187.90 in an hralh thei tlat a ni,” a ti.
January 16-a Congress MLA Pu C Ngunlianchunga’n chief minister Pu Lalduhoma leiba chungchanga sum dinhmun hre lo anga a sawi chu eptu MLA hian a hriat loh vang zawk a ni tih a sawi a. Sawrkar babua ziah loh, leiba ni si – committed liabilities a awm a, works department-in an nei deuh bik niin a sawi.
“PWD, PHE leh P&E ten department thuneihna china sum an lo hman kha a ni a, hemi ba rulh hi a ni. Nikum khan sawrkar babua ziak loh department ho lo hman, P&E bikah cheng nuai 6300 chuang kan rul a. Tunah pawh sawrkar babua lang lo, department thuneihnaa lo bat, rulh kan la ngaih chu PWD nuai 580 chuang, P&E rulh bang nuai 1200 chuang, PHE nuai 5800 leh tlem a ni. Heng hi kum 2017, 2018 atanga leiba awm sa a ni,” TBC Lalvenchhunga hian a ti.
Mamit district chhung Dampa biala Dr R Lalthangliana’n zirtirtu 150 dah chhuah chungchang a sawi chu, leader of opposition ni turin Education minister hlui a bei nge, tia zawtin, “A sawi ho kha MNF sawrkar lai vek kha a ni a. Anmahni an inbeiah ka ngai mai,” a ti.
Sawrkar hmasawnna leh hnathawh tehna chu capital expenditure-ah a lang tih advicer to CM hian a sawi a. Hmasawnna tur hnathawh capital expenditure-ah a lang a, SASCI hnaah nikumah zaa 10 tal hman turah zaa 20 an hmang phak a, hei vang hian cheng vaibelchhe 200 an dawn phah tih a sawi a ni.