LESDE MBBA Inter Veng 2005Semi finals – Tuikual South vs Nursery

LESDE MBBA Inter Veng 2005
Semi finals – Tuikual South vs Nursery
A hriat ta! Veng/khua 62 zet inlanna Lesde MBBA Inter Veng 2025 semi finals khel tur team pahnih a hriat ta! Nizan lamah inkhel pahnih a awm a, result erawh he chanchin buatsaih lai hian kan hre hman lo thung.
Zanin dar 6 leh dar 8:30 hian semi finals khelh a ni dawn a, inkhel hnuhnung zawk turte hi tarlan tawh angin kan hre hman lo!
Mizoram basketball chanchina veng/khua intihsiakna neih tawhah te khan zanina kan hmuh tur Tuikual South hian Nursery veng aiin hnuhma an nei lian zawk a – tunhnaiah erawh Nursery veng an lian zawk ti ila, Mizoram Super League (MSL) club nei veng TKS tantu lamin an pawm lovang!
Tuikual South Bihchianna
Mahni veng/khua tana fehchhuakte tawiawm nachang hria TKS hian an hlachuam ‘phengphehlep tial mawi te…’ tih nen khan Tuikual mai ni lovin an champion chanchin hmang khan Mizoram hi an lo hrut tawh thin; tuna an rising star Jeptha te pian hma hian Babutlangah hnehna hlado an lo chham tawh a – hranghlui Albert-a te leh tun thlenga TKS ban pawimawh Dina leh Rohlua bakah an coach Tyson-a te hian thawnthu lungawi thlak leh lunglen thlak an lo hnutchhiah kha phek tam daih ziah tur a awm ang.
Tun inelna ah hian kum bithliah inelna lama Most Valuable Player (MVP) lo hlawhchhuak tawh, Jeptha-a hming a lian hle. Tawnhriat ngah tawh leh naupang rual seng sawng (Youth & experienced) inpawlh chiat TKS tan hian Faka rintlak zia kan hmu tawh a, Dodo-a leh Zorina te ho khelh that a pawimawh zui zel ang.
Hoops Mania The Aizawl Post hnenah TKS boss Tyson-a chuan, “Pathian zarah kan that ber tum ni lo mah se, kan thlen chinah player-te chungah ka lawm viau, mahse, champion hi kan tum ber a ni.
“Kan player-te hi physically leh mentally in an strong a, coaching staff leh veng mipui pawn an chungah rinna kan nghat. Kan innghahna ber erawh Pathian a ni.
“Tuna kan player-te hi discipline tha vek an ni a. Kan senior player pahnih – Dina leh Rohlua ten veng an hmangaihna hi an fakawm takzet. Tun dinhmun kan thlen theihna chhan chu Pathian vang leh kan Veng LC bakah GSA leh veng mipui te vang a ni.”

Road to semi finals:
College Veng 82 – 97 Tuikual South
Zuangtui 30 – 58 Tuikual South
Tuikual South 67 – 59 Khatla East
Tuikual South 73- 65 Chawnpui

Nursery Veng Bihchianna
Nursery vengin tuna an basketball khelhna hmun hi chei that an tum thu kan dawng – hei hian lantir a neih chu hmunawl tha neih hian hunawl hman thatna tur a siam tih an khawtlang hruaituten an varpawh, hruaitu nei tha veng an ni.
Volleyball lama sulhnu lo nei tha tawh, mahni veng zahpui map lo Londons boys tia inchhal ngam ngat veng hi intawiawm thiam veng a nih zia lanna chu fans an nei chhe ngai lo. Under 23 champion zo hlimhlawl an ni a, chuta an coach Atluanga leh an local council member-te chu an team tawiawmtu phur leh langsar an ni.
Player tha Miller-a quarter finals match tang takah a insum tluan thei ta, a khel tha hle.
Team tana langsar si lova thawhhlawk palian unau pathum – Hriatpuia, Sangsanga leh Tetea te tan thlamuanpui tham, a hming kan lam nawn awn awn fo Emmanuel-a’n point 39 a nei thei hem! Nursery veng thatna thuruk chu an player hmachhuanten duhtawka an khelh theih nana tumah mahni hmasial an awm lo tlat hi a ni!
“Kan that dan bera khel turin kan kim lo thin a, champion sawi nan chuan a la hma deuh! Tun tum erawh kan kim ve ta a, kan thlen chin hi a sang thawkhat tawh ka ti.
“Fitness kan ti nasa a, kan practice tam thei lo nangin, kan ti tak tak thin hle. Basketball court kan nei hi kan vannei hle a, chhun zanin a awl ngai lo! Pathian zarah an u te thachhangdawl tur naupang an rawn chhuah zel ka beisei” tiin Nursery Veng coach Albert-a chuan Hoops Mania The Aizawl Post a hrilh.

Road to semi finals:
Saron 65 – 71 Nursery
Nursery 73 – 56 Mission Veng
Nursery 81- 71 Kanan
Tuikual North 76- 82 Nursery