Leverkusen tan league title hnai zel

Pathianni zanah sihnih faia mikhual VfL Wolfsburg hneh lehin hmahruaitu Bayer 04 Leverkusen chuan point 10 laiin an hnuai chiaha pahnihna luahtu Bayern Munich nena an inkar an pawtzau ta a, an club chanchina Bundesliga title hmasaber tur lawm hun a hnai leh sauh!
First half minute 28-na leka yellow card vawihnih hmuh vangin Moritz Jenz hnawhchhuah a ni a, mikhual ni chunga a tlem zawk nih zui leh chu Wolfsburg tan inven zawh ngaihna a awm lo a ni ber a, minute 37 an khelh tlin rualin Southampton leh Burnley forward hlui Nathan Tella chuan home team hmahruaina goal a thun er zawk.
Second half tawp hma minute chiah awm tawhah Florian Wirtz chuan Exequiel Palacios ball pek la fuhin sinhnih faia Leverkusen chakna goal ni zui ta a thawh ve leh a, a zawnin vawiruk ngawt Xabi Alonso team an chak ta a, champion rim a nam hmui chuk tawh awm e!
Khelh 25-ah Leverkusen hian point 67 nei tling tawhin, Inrinni zana Mainz 05 laka 8-1 hnehna chang hlimhlawt ve bawk defending champion Bayern Munich chuan khelh 25-ah bawk point 57 a an hum ve thung.
Bayer Leverkusen hi tun season inelna hrang hrangah vawikhat mah an la tlawm lo a, game 36 chhung tlawm loh zawn hi thil namai a ni lo ang.
League game bikah pawh a zawnin vawi 25 tehreng tlawm an pumpelh tling ta a, hei hi an club record thar a ni.