Liam Payne death case: 911 call an tlangzarh

Liam Payne death case: 911 call an tlangzarh
October ni 16-a Casa Sur Palermo Hotel, Buenos Aires, Argentina-a a thlenna hotel chhawng thumna atanga tla hlum pop star, an vanglaia khawvela group lar bera chhal ngam One Direction member thin Liam Payne, kum 31, thihna chungchangah tuneitu ten 911 call an tlangzarh ta.
Liam Payne a tlak hlum hma lawkin hotel staff ten police an call a, “Mikhual ruihhlo leh zu avanga buai tak kan nei,” an ti a, “A harh deuh laiin thil a tichhia a, a room a suasam a ni ber,” tiin report an dawng a, police betu hian reception lama an hotu ber niin a insawi a, mahse, Payne hming erawh a sawi lang lo a, an mikhual chu hotel-ah ni hnih-thum vel a thleng tawh ni a sawiin, police te chu enfiah tura mi tir turin a ngen nghal a ni.
Police te betu chuan an mikhual himna atan pawh chu chu a pawimawh ni a sawiin, “Rang takin rawn intir rawh u, a chhan chu, ama tan pawh a tha lo thei ang. Mikhual hi bathlar awmna room-ah a awm a, nunna atan pawha pawi thei thil a tipalh ang tih kan hlauthawng a ni,” a ti bawk.
Hotel atanga police te call dawn hi hotel bathlar atanga a tlak hlum hma minute hnih khat vel chauh niin Argentina National Prosecutor Office chuan an tarlang a, an thuchhuahah chuan city police leh El Sistema de Atencion Medica de Emergencias te a hmuna an thlen chuan, “Payne chu a room bathlar atanga tlain a liam tuar lovin a hmuna a thi nghal a ni,” an ti bawk.
Payne autopsy report Argentina official ten an tihchhuahah chuan a thihchhanah hian ‘polytraumatism (multiple traumatic injuries), pawnlam leh chhunglam thisen chhuak nasa,” tiin an tarlang a, Payne hian a tlakna lamah hliam hmun 25-ah neiin, a lu (head) a hliam leh chhunglam leh pawnlama thisen put nasa chu a tihpui niin an tarlang a, toxicology report chu tihchhuah a la ni lo.
Autopsy report a chhuah hma pawhin Buenos Aires emergency services hotu Alberto Crescenti chuan Payne hliam te chu a nasat em avangin engmah tih theih an nei lo niin a lo sawi tawh a, “Tihnun leh tuma beihna pawh a awm lo, a chhan chu a thi tawh tih an nemnget nghal. A taksa zawng zawnga hliamna tak a nei vek a ni,” a ti.
Liam Payne hi a thih hmain Argentina-ah hian kar hnih vel a cham tawh a, a ngaihzawng Kate Cassidy nen hun an hman dun hnuah One Direction-a a bandmate Niall Horan concert chhim turin October ni 2 khan Florida-ah an let a, chumi hnuah October ni 14 khan Argentina-ah hian a kal leh ta a ni.
Liam Payne hian a ex Cheryl Cole nena an fapa Bear Grey Paynea kalsan a ni.

Liam Payne thihna an chhui zuinaa tuneitute chuan Payne thlenna hotel, Payne thlenna floor, chhawng thumna a room pakhatah ruihhlo ni ngeia riat an hmuh thu an puang a, mahse, an thil hmuh te hi nemngheh a la ni lo a, han en mai chuan ruihhlo leh zu niawm taka a lan thu National Criminal and Correctional Prosecutor Office cuan an tarlang.
Room endiktu te chuan hotel room chhunga furniture leh thildang tam tak chu tihchhiat niin an hmu bawk. Hotel hnathawktu te leh a thih hma lawka Payne-a room-a awm ve hmeichhe pahnih, a thih hma lawka chhuak leh hman tawh te pawh police ten thu zawhfiah atan an la niin an tarlang bawk.
Official-te chuan he thihna chhui hian thil thlen dan mumal zawka hriatchuah leh, midang inhnamhnawih an awm thei em tih te hriatchhuah an tum niin an tarlang bawk.