Liam Payne ruang a chhungte hnenah hlan ta

Liam Payne ruang a chhungte hnenah hlan ta
October ni 16-a Argentina kawpui Buenos Aires a a thlenna hotel chhawng thumna bathlar atanga tla hlum One Direction star Liam Payne, kum 31, chu a boral atanga thla khat dawn hnua a ruang chu Argentina thuneitu ten Payne-a chhungte hnenah November ni 6 khan an hlan ta a, Payne ruang hi vui turin England-ah an hawpui dawn a ni.
Liam Payne ruang hi Argentina thuneitu ten a thih chhan leh toxicology bakah lab test dang dang tih fel vek a nih hma chuan a chhungte hnenah an hlan chhawng thei lo, heng thil tul zawng zawng hi an tih zawh vek hma chuan thuneitu ten kawlin, tunah chuan he case atana public prosecutor chuan a ruang hi a chhungte hnenah a hlan leh ta a ni.
Payne thih hnuah a thlenna hotel chu police-in an dap zui a, hotel atang hian thil chi hrang hrang an la nual a, chung zingah chuan CCTV footage leh hard drive te pawh a tel. Autopsy report atanga a landanin Payne hi a hliam tuar lovin a thi a, a tlakna avangin a taksa pawn lam leh chhung lamah thisen chhuak a tam hle a ni. Thuneitute chuan a thisena ruihhlo chi hrang hrang a awm niin an sawi a, chung zingah cuan ‘pink cocaine’ an tih mai, ketamine leh MDMA, methamphetamine, cocaine, opiods leh psychoactive drug te chawhpawlh a ni.
Liam Payne thihna chungchang an chhui zuinaah Argentina thuneitu ten mi pathum an hreng tawh a, an mi hrente hi Payne hnenah ruihhlo petu leh tihpuitu a puh an nih bakah mi an kalsan hnu lawka thi ta mai an awm avanga hreng niin National Criminal & Correctional Prosecutor chuan a tarlang.
Argentine police ten hotel-a hnathawktu pahnih te chu Payne hnena ruihhlo petu a puhin an man a, an thian pakhat chu a chenna dapin an hreng zui ve nghal bawk. Mahse, police ten Payne thihna chungchanga an mi man te hming hi puanzar a la ni lo.