Link Road
Chief minister Lalduhoma chuan tunhnaia press conference a neihnaah, agriculture link road 46 laih a nih tur thu leh, hei hi hand holding policy tihhlawhtlinna tur a nih thu a sawi a.
Tunhma atang tawhin agriculture link road hi ngaihpawimawh a lo ni tawh țhin a, link road laih kha hmasawnna hnathawh zinga a ri ring pawl a ni thin. A chhan pawh NLUP leh SEDP kalpuitu sawrkar pahnih te khan an policy tihhlawhlinna tura a hmahruaitu atana an ngaih a ni. Buh bal leh thlai chingtute tan chuan agriculture link road hi a hnukpui pakhat a ni lo thei lo a, a pawimawh em em a ni.
Serthlum chingtu tam takin harsatna an tawh zinga an sawi fo thin chu – link road țha a awm loh avanga head load-a serthlum phurh a ngaih țhin avangin head load-a serthlum thiarna manah cheng tam tak an senral țhin avangin serthlum rate a khawih a, chu chu a tawpah mipuiin an lo tawrh phah ve thin a, a man tlawmin serthlum an lei thei lo phah, tih a ni. Link road țha a awm loh avanga head load-a serthlum phurh kual a nih hian serthlum hmelhem a awm phah deuh nge nge țhin bawk a, chu chuan marketing lamah harsatna a thlen bawk.
Hetiang hian link road țha a awm loh avanga thlai chingtuten an tawrh phahna hi a tam em em a, link road țha leh țha lo hian kuthnathawktute dinhmun a hril thui hle tih a lang reng a ni.
Thil dang dangah pawh link road țha pawimawhna hi a tam hle. Tun hnaia ZMC atanga zir chhuak ta MBBS rual țhahnem tak pawh kha, an hlawhtlin theihna atana pawimawh em em pakhata sawi theih chu link road hi a ni tel ve thei tlat a ni.
Medical college hospital te hian zirlaite inzir nana a mamawh pawimawh em em chu damlote hi an ni a. Medical college seat capacity mila medical hospital-in damlo a ngah tawk a ngai ve a, patient load a țhat loh chuan National Medical Commission atanga inspection neih hunah khawlhkham a siam pha thei a ni.
Tuna Zoram Medical College hospital Falkawn ami state referral hospital hian damlo pantu a ngah theih nan a catchment area-a road communication țha tak a awm a ngai a, a chhehvel thingtlang khuaten awlsam taka hospital an pan zung zung theih nan link road țha tak a awm a ngai a ni. Tuna ZMC hospital-in patient load țha tak a neih theihna chhan pawh hi sawrkarin link road a ngaih pawimawh vang a tih theih ang.
Hmasawnna chak tak a awm theih nan chuan awlsam taka inkalpawhna leh thil thiar vel zung zung theihna hi a awm a ngai a. Tuna hand holding policy hming chawia link road 46 laih tur hi a nihna tur anga kalpui theih a nih phawt chuan hmasawnna hmel thar a lang nghal zawt zawtin a rinawm.