A hminga Sport lam buaipuitu ni ve ta fam chu ‘Lionel Messi nge tha i tih zawk Cristiano Ronaldo’ tih zawhna hi ka dawng ve fo thin. He zawhna lar tak hi chhan chakawm a ni lo naa ‘Lionel Messi thiam ka ti zawk a, Ronaldo hi chhuanawm ka ti’ tiin ka chhang ve thin. Thu lai rem nan ‘ Pakhat a thiam a, pakhat a dik’ ti ang deuh kha a ni e!
Messi leh Ronaldo hi Khaikhin hleihtheih loh khawpa piangphung leh mizia inang lo an ni a, an thiam dan pawh a inang lo viau. Messi hi hmeichhe chawhmeh siam thiam tak ang maia chawk kual neuh neuh chi a ni a. Ronaldo erawh hi chu Vawk chhuak um ang maia tlan deuh pur pur chi a ni ve thung. An pianzia leh an khelh dan inang lo viau mah se, khaikhin loh theih loh khawpa ropui chungchuang an ni dun tlat thung si. Ropuina leh hlawhtlin tehna buk lung pawh a inang lo thei viau dawn a. Chu vang chuan ‘pakhat a dik a, pakhat a thiam’ tih ang deuh khan, ‘Messi thiam ka ti zawk a, Ronaldo ngaihsanawm ka ti zawk’ tiin ka chhang ve thing.
Lionel Messi hi Pathianin football thiamna a pek; mi vannei bik a ni a. Football thiamna hi a pianpui tawp mai a ni. Football a thiam em e tih loh hi chu chhuan tur dang a nei hran lo. A pumrua a te si, a hniam si, a pumrua atang rengin thahrui han nei chiam tur chi a ni lo a. Han tlan ving fua fua a, han tlan dawk pur pur tur pawh a ni hran lo a, a tlan ve terh terh a ni mah zawk. Chuti chung chuan football a thiam em em si. Messi chanchin sawitute hian a taima, a thawkrim tih an sawi ngai mang lo. Freekick te hi a chhuih goal ve fo naa a hran pain freekick chhuih a zir ngai hran lo, an la ti leh ta zel. Chuti ni si chu football a thiam em em si. Football a thiam nachhan hi en dang a ni hran lo, Pathian pek, mi bik a nihna a ni a. A awm mai mai pawh hian ball a thiam em em tawp!
Pa tetakte, thawkrim fal em em pawh ni lo Messi hian ram leh ram inelna ngaihhlut hrang hrangah Argentina a champion pui tawh a, Argentina a champion pui tawhnate hi; FIFA World Youth championship 2005, Olympic 2008, Copa América 2021, Finalissima 2022 leh Fifa World Cup 2022 te an ni a. Ram tawn hlawhtlinna hrang hrang a chan tawh bakah club tan trophy lak theih ang zawng zawng chu a la kim tawh bawk. Football-ah mimal chawimawina ngaihhlut hlawh ber Ballon d’Or vawi riat lai dawng tawhin, Ballon d’Or dawng hnem ber a ni fal mek a. Footballer zingah infiammite chawimawina ngaihhlut em em Laureus World Sportsman of the Year a thlan awm chhun a nih bakah footballer zingah trophy chawi hnem ber a ni tel cheu bawk.
A goal thun zo zai te, a khelhpui te goal thun tur a siam zo zaite a/ang hian Lionel Messi thiamzia a hai theih loh a. Messi ball thiamzia hi sawi nep theih pawh a ni tak tak lo. Messi hi ball thiam chungchuang a ni tih kan pawm vek a, kan inhnialna thin chu a thiam ber em, a ropui ber em tih lai hi a ni a. Footballer ka hmuh phak ve tawh chinah kei chuan Messi hi thiam ka ti ber.
Cristiano Ronaldo erawh hi chuan footballer tha ni tura mamawh zawng zawng a nei kim ni a ngaih a ni thung. A pumrua a lian pangngai a, a pian a nalh a, a tlan chak em em bawk a, footballer ni awm renga mawi a ni a. A pian a nalhin, a hmel tha bawk si a, lemchan lamah emaw, model lamah emaw kal pawh nise khawvel huapa lar leh hlawhtling thei awma mawi a ni. A pian phungin a zir a ni ngawt lova, a taima a, a tum a ruh a, a thawk rim em em reng bawk. A thawhrim leh taimak em vanga Messi el phak hial khawpa hlawhtling a, ropuina a ni bawk.
Zep nak emaw Ronaldo hi ball thiam bik leh zei fal bik a ni hran lo. Khawvelin a hriat lar tanna Manchester United-ah bul a tan tirh khan ‘style a kal ral’ kan tih ang chi kha a ni hman. A ke chheh a mawi a, a khengkual nasa viau thin tak naa team tan a thawhhlawk hran lo. A tlu ngun bawk si!! Manager fing Sir Alex Ferguson-a’n a hrual a, amah a taima a, inzir mi tak a lo ni bawk nen hma a sawn chak ta em em thung a. A hmasawnna hi tute emaw tawngkam takin ‘a zuanin a zuang’ a tih theih ta hial. Messi thiamna hi thil pek a ni a, Ronaldo thiamna erawh chu thawhrim rah ‘thawhchhuah’ a ni ve thung.
Ronaldo taimak zia hi a khelhpui ten an sawi thin, “training naah kan thlen khalh ngai lova, bang hnuhnung ber a ni zel bawk”, tiin. Messi-a’n a hran a hraia freekick chhuih dan a zir lem loh laiin Ronaldo erawh hi chuan a zir tlauh tlauh a, a tichhin tluk tluk thin an ti bawk. Training naah a thawhrim ang bawkin mualchhungah a taima a, a thawkrim thin bawk. Hah thei lo ang maiin a tlankual reng a, chak a duh luat vangin mualchhungah a inthlahdah hmel hmuh tur a awm ngai lo.
Chak loh tuma Messi ti hnek hnek leh beidawng hmel ang hi Ronaldo hmelah hmuh tur awm ve ngai lo. Chu chuan a taima mai a ni lo, Ronaldo hi a huaisen tih a lantir leh. Hei vang hi a nia Ronaldo ka duh em em! Team captain atan tu emaw zawk zawk hi thlan tur ni se ngaihtuah buai tam lovin Ronaldo ka thlang ang.
Cristiano Ronaldo hian Euro 2016-ah Portugal a champion pui tawh naa World Cup trophy a la chawi ve lo hi Messi aia dahsan a har nachhan lian tak a ni a. World Cup-ah champion ve ta se Messi nen an an chungchanga inhnialnaah ngaihdan a siam fel theih mai thei a, ngaihdan a phir leh zual thei zawk hlauh bawk. Champions League-a goal thun hnem ber leh ram tana goal thun hnem ber Ronaldo reord siam hi a elpui lian Messi hian a khum a rinawm tawh loh.
Goal thun tam hi a ropui a, a hlu bawk. Chutihlai chuan goal thun ngawr ngawr hi thlawhtlina erawh a ni ber lo thung. Ram tana goal thun hnem ber ni reng thin Ali Daei hi ram tan goal a thun hnem em vangin Messi chunga dah ngawt chi a ni lo. India captain Sunil Chhetri pawh ram tana goal thun hnem ber zinga mi a ni a, India tan goal a thun hnem vangin a hnuaiah Robert Lewandoski te, Erling Haaland leh Kylian Mbappe te dah ngawt nachhan tur pawh a awm hran lo. Ropui tehna chu an champion na a ni tlat zel. Champion na atanga ropuina kan teh dawn chuan Cristiano Ronaldo chu Lionel Messi nau a ni e!
Leh lawk, Tennis-ah Grand Slam, ATP Finals leh ATP Masters a champion tam ber Novak Djokovic aia Roger Federer thiam ti zawk an tam mai. Chutiang chu Messi leh Ronaldo chungchangah pawh hian a ban bik ka ring lo.
Ziaktu : Hruaia Pa
-- Advertisement --
Copa America 2024 – Fixture
June 27, Ningani zing
Ecuador v Jamaica 3:30 AM
Venezuela v Mexico 6:30 AM
June 28, Zirtawp zing
Panama v United States 3:30 AM
Uruguay v Bolivia 6:30 AM