Lirnghing-in Afghanistan a sawi

India Sana-a Nilaithawhtan zing dar 1.09 khan Afghanistan ramah lirnghing-in 4.3 Ritcher Scale-a na a nih thu National Centre for Seismology (NCS) chuan a sawi a, lei hnuai 150 Kms vel atanga rawn intan niin a sawi bawk.
“Lirnghing Magnitude 4.3 Ritcher Scale a na-in Afghanistan ram a sawi a, he hi ni 26.10.2023 zing dar 1:09 vela thleng a niin lei chhung 150 Kms vel atanga rawn intan a ni” tiin NCS chuan anmahni puala an enkawl X ah an sawi a ni. He lirnghing hi tunhnai maia lirnghing thlen vawi 4-na niin ram rethei tak Afghanistan hi a rawn sawi leh a, tuna a rawn nghing leh hi lirnghing na tak maiin Herat province-a mi 4,000 lai maiin nunna an chan phah tak kar khat hnu lawka rawn thleng leh a ni.
October ni 15 khan lirnghing magnitude 5.4 Ritcher Scale-a na in Afghanistan ram hi a lo sawi nghing tawh a ni.
Hemi hma lawk October ni 13 hian magnitude 4.6-a na in Afghanistan ram hi a lo sawi tawh a. Hei aia na magnitude 6.1 Ritcher Scale-in October ni 11 khan Afghanistan ram hi a lo sawi nghing tawh bawk a ni. Kar kalta mai khan Herat Province-Afghanistan chu lirnghing hian sawiin mihring nunna 4,000 laiin an chan a, chenna in sang tam tak a tichhe bawk, tiin Taliban enkawl sorkar chanchinbu Khaam chuan a sawi a ni.
Herat Province leh a chhehvel hmun te hi lirnghing 6.3 magnitude velin a sawi bakah aftershocks na em emin a nuai a ni. Taliban kaihhruai sorkar hnuai-a Ministry of Disaster Management of Afghanistan chuan Inrinni kal ta khan Herat-a thingtlang khua 20 atangin chenna in 1,983 vel lirnghing hian a tih chhiat thu a sawi a ni.
Taliban te hian Herat biala lirnghing avanga thi leh hliam zat chiah hi an la puanglo a ni.