Lirnghing vanga nunna chan 9,500 tling tawh

Turkey lirnghing avanga nunna chan chu mi 9,500 chuang an tling tawh a, World Health organization chuan nunna chan hi an la awm belh zel tur thu a sawi. Lirnghing hian mi maktduai 23 vel te chu a khawih buai dawn a ni.
Turkey bikah nunna chan 6,234 an tling tawh niin Turkey disaster agency chuan a sawi a, Syria ramah chuan nunna chan zat chiah hriat a har hle a, mahse, state media te chuan mi 2,500 chuangin nunna an chan tiin an sawi.
White Helmet rescue group, Syria a rebel te thununa hnathawka awm te chuan an awmna chinah nunna chan 1,280 an awm tawh tiin an sawi bawk.

Emergency workers te chuan zan khawvawt lutuk hnuaiah pawh chawl hauh lovin chhanchhuah hna an thawk a, in chimin a delh mi tam tak an la awm anga ngaih niin chung mite chu chhanchhuak turin hun an nei rei lo hle tawh a ni.

Turkey President Recep Tayyip Erdogan chuan lirnghingin a khawih nat zual province 10 ah emergency a puang zui bawk a.

Khawvel ram hrang hrang te pawhin tanpuina thawn lut mekin a thente chuan specialist team te, uisathiamte leh hmanruate an thawn lut bawk.

Hetih lai hian Turkey ram chhungah kum sawm hnih kalta atang khan sorkar chuan ‘earthquake tax’ a la tan tawh a, khatih laia lirnghing na tak thlen hnua he tax hi a lak a ni.

Chhiatrupna laka him nan leh emergency services tihchangtlun nan $4.6 billion vel a hmaa sen tawh anga ngaih a ni a. Kum 1999 khan northwestern Turkey-a lirnghing avanga mi 17,000 chuangin nunna an chan avanga ruahmanna siam a ni.

He special communication tax hi thuneitute chuan Turkey a lirnghing a awm apianga an sawi a ni a, mahse, sorkar chuan heta sum dah hman dan a la sawi lang ngai lo an ti.

“Kum 1999 atanga kan chhiah pek khawmte kha khawiah nge hman a nih?” tiin kum 61-a upa Celal Deniz chuan a sawi a. Deniz unaupa leh a fapate chu building chimin a delh mekin an la awm a ni.