President Joe Biden chuan February 7 zana State of the Union address a neihah Republicans te chu economy siam tha leh tur leh ram inlungruala siam tura thawhhopuiah a sawm a, US-a beidawng zawnga thil thlirna leh Washington-a politics a inthenhranna awm nasa mek chinfel tumin hma a la a ni.
-- Advertisement --
“America storty hi hmasawnna leh khauh tak a ni,” tiin a sawi a, Covid-19 pandemic len hnuah a sorkar chuan hna tautet record a siam thu a sawi bawk a.
Biden chuan Capitol beih hnu kum hnih hnuah America democrcy chu ‘kun lo leh kehchhe lo’ tiin a sawi bawk a.
Biden chuan a hun chhung kum hnih chhunga bipartisan lama hmasawnna awm te sawiin chung zingah chuan infrastructure pawimawh leh high-tech manufacturing lam te a sawi lang a. “He Congress tharah hian kan thawhho theih lohna tur leh thil pawimawha kan inlungrual theihlohna chhan tur a awm lo,” tiin a sawi.
“Mipui ten an duh an sawi tawh a. Inbeih reng te, thuneihna duha inbeih reng te, inhmuhthiam loh reng te hian khawimah min thlen dawn lo an ti a ni” tiin Biden chuan sawiin, “Chu chu kan ram tana ka hmathlir ni reng a ni a. He ram hi chawi nun a, America innghahna middle class te tihchaka he ram inlungruala siam hi a ni,” tiin a sawi a. “Hna hlen tura helai hmun tirh hi kan ni,” tiin a sawi bawk.
US hian ram chhung leh pawnah mumal taka kal dan a haihchham rih hle tia sawi a ni a, a economy a tha em em lo va, Ukraine indonain a bawh buai bawk a, China nen inbakkaihna an nei reng bawk a, hengte avang hian Biden chu inthlan leh hunah than tlin a ni leh kher ang em tih pawh zawhna a ni.
Kumina Biden thusawi chu nikum nena khaikhin chu politics thilah pawh danglam tak a ni a, a chhan ber pawh Republican te chuan House an thunun tawh vang a ni a. Hei vang tak hian President Biden chuan policy mitla thehchhuah aimahin ram dinhmun ngelngheta siam chu sawi berah a nei lo thei lo.
President annual address neihnaah hian cabinet member, Supreme Court justices, diplomatic corps te chu January 6, 2021 a Capitol suasam a nih atang khan venhimna khauh zawk hnuaiah an pungkhawm a ni.
Democratic stalwart Nancy Pelosi chu House Speaker atan Republican kevin McCarthy chuan a thlak tawh bawk a, chamber-a Republicans ten Demcoratic president hi engtiangin nge an beih dawn hriat a la ni lo.
McCarthy chuan thusawina a neihah ‘zah taka’ an hmachhawn tur thu sawiin chutih rual chuan Biden chuan ‘extreme MAGA Republicans’ tih tawngkam hmang lo turin a ti zui nghal a, he tawngkam hi Biden-an a hman rim tak a ni.
“Speech ka pawtthler ve dawn lo va, game ka khel ve dawn hek lo” tiin McCarthy chuan a sawi a, hei hi Nancy Pelosi-in President Donald Trump-a State of the Union address hnuhnung ber speech a pawhthler a sawina a ni.
President Biden thusawi hma hian The Associated Press-NORC Center for Public Affairs Research tena poll an lakah US puitling hmun lia thena hmun khatte chauhin US chuan kawng dik a zawh mekah an ngai tiin an sawi a. Chumai bakah Democrats tam ber te chuan Biden chuan term dang chelh leh tum lo se an duh tih a ni bawk.
“Nangni leh in fate tan kawng zawh tur a awm tawh lo nia ngaihna in nei tih ka hria” tiin Biden chuan a sawi a, “Hei vang tak hian economy siamthata hna nei lo awm miah lo tura hmalak kan tum reng a. Hna a lo let leh tawh a, tun hnai kum hnih chhunga thutlukna kan siam avangin kan pride pawh kan nei let leh tawh a ni,” tiin President Joe Biden chuan a sawi.