Lirnghingin a zawnin India chhehvel vawi li sawi

Lirnghingin a zawnin India chhehvel vawi li sawi
Pathianni tuk khan darkar khat chhung lekin India, Myanmar leh Tajikistan ramte chu lirnghing vawi liin a sawi a, Asia chhim leh lailia na zawk a thlen hlauhna a lian hle.
Himalayan khua atanga Asia lailia khawpui lian thlengin lirnghing hian sawiin mi tam takin an in an tlanchhiatsan hlawm.
A nghing hmasa ber hi zing dar 09:00-ah Himachal Pradesh-a Mandi district-ah a ni a, leihnuai km 5 atanga intan niin magnitude 3.4-a na niin National Center for Seismology (NCS) chuan a sawi.
Thi leh hliam leh thil tihchhiat a neih hriat a ni lo.
Hemi hnu lawkah hian magnitude 5.5-a nain Myanmar lailia Meiktila bul atangin a insawi leh niin US Geological Survey (USGS) chuan a sawi a. Hei hi March 28-a magnitude 7.7-a nain a sawi avanga mi 3,600 chuang thihna a thlen hnua nghing nawn leh (aftershock) na ber pakhat a ni.
Zing dar 09.54-ah magnitude 6.1-a nain Tajikistan a sawi leh bawk a, hei hi lei hnuai km 10-a thuk atanga intan a ni.
A bul hnai khua tam takin a nghing hi an hria a, dawr leh sikul eng emaw zat chu him zawk nan tihruah a ni.
Chawhma dar 10.36-ah magnitude 3.9-a nain a sawi leh a, hei pawh hi lei hnuai km 10-a thuk atanga intan a ni.
Lirnghing hi leilung chet dan azirin seismograph hmanga teh a ni a. Magnitude an tih hi a nat zawng sawina niin Richter scale pawh hman thin a ni.
Magnitude 3-4 chin hian chhiatna a thlen mang lo va. Magnitude 5-6 chin chu na khat tak a ni tawh a, in sak tha lote chu a tichim thei.
Magnitude 6 chung lam chu lirnghing na a ni tawh a, chhiatna nasa tak a thlen thei thin.
Lirnghingte hi lei hnuaia a intanna thuk zawng asirin chhiatna a thlen hi a inang lo thei hle bawk a. Lei hnuai ril atanga intan ang chi hi a magnitude a san vak loh pawhin leilung pawn lamah a thawk na thei thin.