Lirthei a pung, traffic a jam zual

Tunlaiin Aizawlah lirthei a pung a, traffic a jam nasa mep mep hle. Aizawl hmar tawp lam atanga chhim tawp lama kal turin darkar hnih chuang te a ngaih chang a awm.
Lirthei a pung han tih hian mipuiin lirthei an lei thar nasa thut tihna lam a ni lo a, kum tawp lamah lirthei tlan a pung tihna a ni. Chu chu kum tina Aizawla awm dan a ni.
Traffic police te chuan December-ah Aizawlah lirthei tlan a pung nasa thin an ti a, thla tir lam atangin a pung a, sikul naupang an chawlh atangin a pung lehzual thin an ti.
“Kan kawngpuia lirthei tlan zat hi hetia han en mai pawh hian a tam tih a lang reng a, kan kawngpui hian a zo lo a ni ber,” khawlaia duty traffic police pakhat chuan a ti.
Traffic police-te chuan a hranpaa han chhut kilh kelh ni lo mah se kawngpuia lirthei pun dan hi a namai lo tih an sawi a, thla dangah aiin December-ah hian a let khat mai ni lovin a pung an ti, a let hnih a let thum vela apun ring pawh an awm.
Traffic police-te sawi danin, Aizawl khawpui chhungah pawh Zarkawt leh Zodin inkarah lirthei tlan hi a pung zual a, hei hian hmun dang pawh a nghawng.
‘Mi bazar hun a ni a, bazar-ah mihring an pung a, chu chu Zarkawt leh Zodin inkara lirthei pun nasat chhan ber hi chu a ni ang. Bazar-a kal turin lirthei kan hman a ngai tlat a,’ traffic police-te chuan an ti.
Traffic hotute chuan lirthei khalhtute chungchangah chanchin lawmawm sawi tur a awm thin thu an sawi a, tun hnaiah khualzin phurtu lirthei khalhtute’n rui chungin lirthei an khalh em tih an enfiah thut thut thin a, lirthei khalhtute an lo harhfim tih an hmuhchhuah thu an sawi. Zing, chhun leh tlaiah te an enfiah thut thut thin a, Thawhtanni pawh khan zu nam an awm lo.