Lirthei chetsualnaah pahnih thi

Lirthei chetsualnaah pahnih thi
Tunhnaia Mizoram hmun hniha lirthei chetsualnaah mi pahnih an thi a, pakhatin hliam a tuar.
Thudawn danin, Inrinni tlai dar 4.30 vel khan Siaha district Theiva khaw bulah Siaha DC lirthei, Bolero MZ-03 8118 a chesual, a khalhtu Rochungliana (39) s/o Lalenga (L), Bualpui NG khua, tuna New Siaha-a khawsa mek chu a hmunah a thi. Mi thenkhatin hmeichhe pakhat phurh a nei nia an sawi erawh he chanchin buatsaih lai thleng hian finfiah a la ni lo.
Thudawn danin a chetsualna hi Theiva atanga km.4 vela hla a ni a, a tlakna atanga lirthei an hmuhna inkar hi metre 150 vel a ni. Tuipang-a mi a dah haw, Siaha lam pan leh a ni a. A chetsual chhan chiang taka hriat a ni loa, a tlan chak deuh a nih rih a ni. Theiva khawtlang hruaitute sawi danin, an khaw paltlang national highway kawngpui hi siamthat a ni a, kawng a tluang tha a, hei vang hian lirthei khalhtute an tlan chak deuh thin a, tunhnai ringawtah pawh lirthei pathum chesual tawhin, mi panga in nunna an chan tawh niin an sawi.
November 27 zan khan Aizawl atanga Darlawn pan scooter chu Kepran thlen dawnah a chesual a, pakhatin nunna chanin pakhatin hliam a tuar.
Thudawn danin, kar liamta Ningani zan dar 8.30 vel khan Lawngtlai lam pan tum nia sawi lirthei (Super Carry) khalhtu chuan Kepran-a tuala lo thute hnenah an khaw daiah lirthei chesual an awm a, amah a hmanhmawh avangin a bawihsawm hman lo niin a zualko a ni. Kepran-a mi tlawmngaite chuan thil awm dan finfiah tumin lirthei chesual awmna lam nia a sawi hi an pan nghal a, a sawi ang aiin a lo hla daih nghe nghe a ni. Hemi chhung hian hnamdang (Vai) khalh truck pakhat leh car pakhat an tawk hman a, an ni ho an zawh pawh hian lirthei chesual an awm thu hi an sawi a ni.
Mi tlawmngaite an va thlen hian, kawngpui vang tan zawnga scooty tlu, lo la in ‘on’ reng an va hmu a, heta chuang mi pahnih hliam tuar an va hmu bawk. Pakhat zawk hi a biak hleihtheih tawh loa, pakhat zawk hi a lo la vai/ chiang lo ruai nia sawi a ni. Theih ang anga bawihsawm nghalin, hliam pakhat zawkin Darlawn lam mi an nia a sawi angin Darlawn lam pawh biakpawh an ni a, an pahnih hian Darlawn damdawi in panpui nghal an ni bawk. Pakhat zawk – Freddy Malsawmkima (21) s/o Lalthachuanga, Darlawn chu chhan hman a ni ta lo a ni.
Thudawnna sawi danin, nunna chan ta Freddy Malsawmkima hi kum thar lama nupui neih tum, a nupui tur pawhin fa keng lawk tawh, tunhnai maia nau nei tura inbuatsaih mek an ni.