Lirthei chetsualnaah pahnih thi

Lirthei chetsualnaah pahnih thi
Hmun hniha lirthei chetsualnaah mi pahnih an thi a, hmundanga hriselna lam that lohna avanga chetsualnaah sawrkar officer pakhat a thi bawk.
Thudawn danin Lalramchuana (45) h/o Lalneihhnuni, Thenzawl Venghlun chu kumin January 22-a a Eeco Van hmanga Aizawla passenger a thlah haw lam chu a chin hriat zui a ni loa, a chhungte nen an inbiakpawh hnuhnung ber hi January 22 zan dar 10.00 hnulam niin, Thenzawl panin a tlan a, Melriat a thleng niin a sawi. Hemi hnu hian a phone hi a la zui tawh lo.
Chin hriat loha a awm hnu ah January 24 tlai khan a ruang hi Sialsuk leh Thenzawl inkar, Khampuiah hmuh a ni a, a lirthei hian a tlanliam nia ngaih a ni. A lirthei hi kawng atanga metre 100 chuang daihah a awm a, ruang hi chu lirthei awmna hma daiha hmuh a nih avangin a lumna lamah a vawrhchhuak nia ngaih a ni.
Hetihlai hian a chetsualna bulah hian thisen nia hriat a awm nual a, a phone pawh a tlanliam nia sawi atanga metre 10 vela hlaah hmuh niin, a phone hi a ruang an hmuh hma lawk thlengin a biakpawh (ring) thei reng nia sawi a ni bawk.
Chanchin buatsaih lai hi chuan police station-ah chuan mi bo anga report dawn bak, tualthihna kaihhnawihah thubuai thehluh a la awm loa, a ruang hi Thenzawl CHC-ah post mortem a ni.
January 23 khan Lalramliana (18) s/o Lalpianfeli, Sairang Dinthar chu lirtheia chetsualna avangin a thi. Thudawn danin, Lalramliana hi a scooter-in Sihhmuiah truck ding lai a su a, ka pawh chhawn lohin a thi a ni.
Mizoram sawrkara Chief Controller of Account joint director -in- chief ni mek Dr Lalmuanpuia (49), MF&AS chu kumin January 21 tlaia a chaw eikham kut sil tur chu a BP sang luhai nveng zo loin kut silna bul tukverhah a tlaliam palh a, hliam na tak tuarin Ebenezer Medical Centre-a enkawl a nih mek laiin, Januayr 25 zing dar 6.15 khan a thi. Mizoram sawrkar hnuaiah hna pawimawh tak tak lo chelh tawh a ni.