Lirthei intlanchhawk hman mek ang hman chhunzawm rih dawn

Lirthei intlanchhawk hman mek
ang hman chhunzawm rih dawn
Danin thuneihna a pek ang leh Coordination Committee on Traffic Management rel angin, Aizawl khawpui chhunga lirthei intlan chhawk dan tura mipui hriattirna chhuah tawh chu thu leh awm hma atan chhunzawm tur a ni tih SP Traffic Aizawl chuan hriattirna a tichhuak.
Lirthei intlanchhawkin a huam chin tur kawngpui chu – Bawngkawn leh Kulikawn inkar main road: Bawngkawn Zosangliana Point atanga Kulikawn (Ngaizel, Tlangnuam leh Pika Road peng) thleng; Chaltlang, Ramhlun North, Ramhlun Venglai, Ramhlun South, Chanmari, Zarkawt, Dawrpui, Venghlui, Upper Khatla, Mission Veng, leh Thakthing kaltlangin.
Sikulpuikawn atanga Khatla 23 Assam Rifles gate bul/ Marova Traffic Point (MINECO peng) thleng leh Sikulpuikawn atanga Khatla, Tennis Court, Temple Square, Tuikual South, Tuikual North, Dinthar, Vaivakawn Taxi Stand Dawrpui Vengthar peng thlengin.
Sikulpuikawn leh Vaivakawn inkar main road:
Heng kawngpui dung tarlan loh zawng, Aizawl khawpui chhung kawngah chuan lirthei tlan theih vek a ni anga, hei hian entry period nei hrang lirtheite erawh a huam lo.
Lirthei (mimal, sawrkar leh bungraw phur, district dang lirthei leh state pawna lirthei register-te pawh huamin) intlanchhawk hian nipuiah zing dar 9.30 atanga tlai dar 6.00 thleng, thlasikah zing dar 9.30 atanga tlai dar 5.00 thleng a huam anga, Inrinni, Pathianni leh sawrkar chawlh a huam lo.
Taxi (LMV leh two wheeler) te tlan dan tur: Group panga – A, B, C, D leh E-ah then an ni a. Nikhatah group li (4) zel an tlan anga, group khat zel an ding ang. Taxi intlanchhawk hian Thawhtanni atanga Zirtawpni apiangin zing dar 9.30 atanga tlai dar 6.00 inkar a huam anga, Inrinni leh Pathianni a huam lo.
Tlan loh nia Aizawl hmar lam atanga khawpui laili paltlang theilote tan Bawngkawn Sairang Road – Durtlang, Bawngkawn Sairang Road – Zemabawk road-ah a tawn tawna tlan theih a ni a. Bawngkawn Sairang road leh Ramhlun Road hnuai ber (College Road) ah Bawngkawn Sairang peng kaltlangin tlan theih a ni. Chaltlang road leh Ramhlun main road erawh tlan phal a ni lo.
Aizawl chhim lamah: Venghnuai atanga Kulikawn Presbyterian biak in bul kaltlangin Kulikawn Pika Road lamah, a tawn tawnin a tlan theih bawk ang.
Lirthei intlanchhawkin a huam ve loh tur te: larsap, chief minister, deputy chief minister, Legislative Assembly speaker, ministers leh Legislative Assembly deputy speaker official lirthei (an carcade tiamin), MLA ho leh AMC corporators; Guwahati High Court judge ho.
Home department (Police, Fire & Emergency Services, MRHG&CD, Prisons, FSL), Excise & Narcotics duty, Medical & Hospital Emergency duty, PHE/PWD/P&E Emergency duty, Disaster Management hnuaia emergency duty, PHE tuisem, ambulance /morgue van, executive magistrate – dan leh thupek kenkawh kawnga duty, print & electronic media, National Informatics Centre-a thawkte, army leh para military force, sawrkar department /office despatch rider ho, kohhran hminga lirthei register ho, AMC hnuaia bawlhhlawh paih lirthei ho, rualbanlo tana special vehicle, bawnghnute sem leh chanchinbu sem te.
Public service vehicle (passenger phur chi lirthei) – city bus/ bus, maxi cab (state dang registered huamin), institution bus, department bus ho.