Lirthei luh theih lohnaa awmten sum thawhin bawlhhlawh paih tir

Chhinga Venga lirthei luh mumal lohnaa awm Bethany-a thlera chengte chuan sum thawhkhawmin bawlhhlawh khawna paihsak tur an ruai a, Aizawl East-II bialtu MLA, minister B Lalchhanzova chuan sum hi thla tin a thawhpui dawn.
Chhinga Veng Bethany-a thler hi motor kawngpuiin a paltlang that loh avangin bawlhlawh paih kawngah harsatna an tawk nasa thin a, helaia cheng ho hian sum thawhkhawmin bawlhlawh, ‘door step collection’ hi nikum June atang khan kalpui tanin, AMC lam nen pawh thawhhona hi siam a ni.
Chak zawka hmalakna kalpui a nih theihnan Thawhtanni zing khan bawlhlawh paih chungchanga an hmalakna thawhpui nan bialtu MLA hian thawhhona thuthlung a ziahpui a. Bawlhlawh khawntute hlawh tur thlatin Rs. 6000 a tumpui anga, Bethany chhungkaw tinte thawhkhawm nen thawktu hlawh hi pek zel tum a ni.
“Sawrkar kut nghak kherloa, Chhinga Veng Bethany-a chengten sum thawhkhawma bawlhlawh khawn tur ‘care taker’ an ruai hi thil ropui tak a ni, sawrkar leh mipuiah thawhhona tha a awm chuan hmasawnna daihrei leh tlo kan nei thei dawn a ni,” a ti.
Consumers Union Armed Veng Branch nen pawh Thawhtanni vek khan thawhhona thuthlung an ziak a. An ni hian hun engemawchen atang khan tha takin Consumer Union hi an lo kalpui a, an hmalakna tawiawma tichak turin B Lalchhanzova hian kumtin Rs. 10000-in kum 5 chhung a pui dawn a ni.
India sawrkarin consumer welfare a ngaipawimawh hle tih Consumer Affairs minister B Lalchhanzova hian a sawi a. Ministry hmingah pawh Ministry of Consumers Affairs, Food & Public Distribution tiin a dah tih sawiin, “Keini state-ah pawh consumer affairs lam hi chak zawka kalpui chhoh tum a ni,” a ti.
Armed Veng-in Consumer Union Branch nung taka a kalpui thei chu a chhuan thu leh veng dang leh kawhdang fuihphurtua tang chho zel turin a chah a ni.