Tui pump-na khawl that hun tur an la sawi thei lo

Aizawl khawpui tui lakna thar, 37 MLD Water Treatment Plant Setlak ami chu tunhnaia tuilianin a khawl a tihchhiat chu siamtir mek a ni a, siamthat theih hun tur hriat a la ni lo.
UD&PA minister K. Sapdanga chuan Thawhtanni khan Aizawl Smart City Ltd. leh SIPMIU hnuaia hmalakna thenkhat – City Centre Dawrpui, Multipurpose Ground High Field Zarkawt, 37 MLD Water Treatment Plant Setlak, Solid Waste Management Centre Luangmual, Plastic Waste Management Centre Luangmual leh Tuivamit Playground tlawhin, hnathawh dan a enfiah.
Minister hian Cyclone Remal avanga Tlawng tuilianin 37 MLD Water Treatment Plant a tihchhiat hnuhma a enfiah a. He water treatment plant hian kumin April 27 atang khan Laipuitlang tuizem lianah nitin tui thianghlim litre maktaduai (MLD) 10 a pump chho a ni. Laipuitlang tuizem lianin a chawm veng hrang hrang hnenah tui an mamawh ang zelin a pump chhuak a. Cyclone Remal vangin Raw Water Pump House chu tuilianin a chimpil a, tui pump khawl thuaivirtu electric motor pathum leh control panel, sensor leh thildang engemawzat a tichhia a ni. Heng khawl rit tak tak hi hnawmhnawkin a bawh bakah a panna kawng a tlakbal avangin kawng siam chawp a nih hnuah Guwahati-a siam turin thawn a ni a. A that hun tur a la sawi theih loh a ni.
Tuilian avanga chhiatna thleng siamthat nan hian sum tam tak mamawh a ni dawn a. UD&PA minister hian SIPMIU-in Phase III siamthat dan tur ruahmanna a siam a enpui bakah rang tak siamthat a nih theih nan theihtawp a chhuahpui tur thu a sawi a ni.
37 MLD Water Treatment Plant hi Aizawl Greater Water Supply Phase I & II nen tangtlangin Aizawl khawpui tui in tur mamawh belhna hi kum 2033 thleng a phuhruk thei tura duan a ni.
City Centre Dawrpui hi duh angin bungraw lakluhna a awlsam loh avangin hmalakna a chak thei lo tih thawktuten an lo sawi a. Chutihrualin mipui mamawhna hria in, theihtawp chhuah a, mipuiin an chhawr thuai theiha hma lak an tum tih an sawi.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More