Mihringin boruak thianghlim hip tur kan neih zel theihna’n mite chochhuah tuma India ram pum thirsakawra fangchhuaka tlangau Vanlallawmzuala Varte (LZ-a) chuan ram a fan chhung hian lirtheiin a su teuh ngun hle a, tum khat phei chu a tai thlu tih a sawi. A tlangauna ber boruak tha hip zel tur a awm zel theihna’n hunpui laiin halpuah leh halmawi hal loh a thlawp tih a sawi.
-- Advertisement --
LZ-a hian kumin January 25 khan ‘Ride To Clean Air’ changchawiin India ram fan tumin Aizawl a chhuahsan a. Mizoram Pollution Control Board-in a bul tumsakin, thupuiah “Clean & Green Sustainable Lifestyle Under Mission Life” tih a hmang.
“Khawvel lum zel (global warming) in a nghawng sik leh sa inthlang danglam nasa (climate change) hi ka vei ve em em a; tih theih enge ka neih ve tiin ka inzawt thin. Thirsakawr hi ka hmanraw neih ve ber a ni a. Fitness a that lai hian India ram pum thirsakawra fangchhuakin ka thil vei hi auchhuahpui ila ka ti a ni,” tiin a thil tum tihlawhtling tura turtu awm hi a sawi a ni.
A chhuah ni – January 25 hian a damlo nghal a; Tripura lam pan a ni a, missionary-te a bel. “Pastor leh missionary ka bel kha ka tifuh hle. Hmun hrang hranga Zofate ka bel ve tawp zel,” a ti.
A zinkawngah hian lirtheiin a sut teuh deuh deuh tum a thleng foa, Uttar Pradesh-ah phei chuan lirtheiin a tai thlu a, ngaihven loin a tlansan zui tih LZ-a hian a sawi. “Lirtheiin min sut teuh thin dan hi ka chhungte leh thiante bulah pawh ka sawi duh ngai lo. Min ngaihtuah theih em avangin,” a ti. Tai thluk a nih a, tlansan a ni chu Mizo zia nen inanglo ema a hriat avangin a rilru a ti na tih a sawi.
Ram fanga thirsakawra ni 204 a zin chhung hian tum 8 a dam loa, tum khat chu ni hnih a chawlh phah. Hemi tih loh chu damdawi eiin a tlan lui mai zel tih a sawi. Tum 22 a thirsakawr ke a puncture a, hei lo pawh a part dang chhiat tum a awm. A tha lo tur anga ngaih chu khawpui lianah a thlak mai zel a, state hrang hranga part remkhawm thirsakawr a rawn hawnpui tih a sawi.
A zin chhung hian tualchhung mi atangin harsatna a nei loa, an tibuai lo mai ni loin, thirsakawr chu an dahhniam loa, a thil tum hrethiam pha lutuk lo pawhin an lo lawm thiam zawk thin hle tih a sawi. Mizoram la hre ngai lo leh a awmna hre lo erawh an tam a, “Mizoram awmna sawi tura zin chhuak ka ang ka inti thin,” a ti. Nitin hetiang hi mi 5-10 inkar a tawng pha hial niin a sawi.
Tlangram hmun dangah kawng an nei chhuk chho a, Aizawlin kawng kan lo nei tha viau zawk niin LZ-a hian a sawi bawk. Aizawl aia kawng chhuk chho zawkah pawh cycle an hmang uar a, lirthei dang tlan nen an intibuai lem lo tih a sawi.
A zinkawngah hian Ladakh kalkawng chu hrehawm ber nia a hriat thu a sawi. Chutihlaiin, Navi Mumbai luh dawnah ‘heat wave’ in a nuai a, hei hi heat wave a tawn vawikhatna a ni tih a sawi a; Rajasthan-ah sandstorm-in a nuai bawk tih a sawi a ni.
Khawvela lirtheiin a zawh theih sang ber, Umling La Pass (Ladakh) a kal tur chu a hrechiangtuten atthlak an ti hle tih LZ-a tawiawmtu YMA Mission Veng Branch president Dr Zodinpuia chuan a sawi.
Atthlak an tih chhan chu, car leh bike emaw in he hmun hi an kal thin a, gate siam bikah thirsakawra kal duhte chu an kal chauh thin. Chutah pawh chuan a boruak dinhmun dan pangngaia nei (acclimatize) turin an awmchilh hmasa phawt a. Chutiang ti miah loa, thirsakawra mel tam kal tawh leh kal mek LZ-a’n tlawh ve a tum mai chu a ni tih Dr Zodinpuia hian a sawi. LZ-a zin chhung hi chawhrualin ni khatah km.83 vel tlan ang a ni tih a sawi bawk.
Tuna a zinchhuah chhan nena inrem tak, hunpui laia halpuah/ halmawi hal chu a thlawp loa, sawrkarin khap zel se a duh tih LZ-a hian a sawi a ni.
Heng hi Ningania Aizawla thuthar thehdarhtute nena an inkawmnaa LZ-a sawi leh zawhna a chhanna a ni.
8 India rama state 28 leh UT 5 tlawhnan hian km. 17045 vel a kal a, ni 285 (thla 9 leh ni 12) a thang. Nikhata a tlan thui ber chu km 207.82. a ni a, Lucknow atanga Badlapur UP kalkawng a ni.
8 January khan km 500 vel a tlan hman a, February – April khan km. 2000 chuang thlatin a tlan. May – November hian thlatin chawhrualin km. 1278 vel tlan ang a ni tawh.
8 Tuna a zinkawngah hian a chhoh tlan (elevation) zawng zawng hi metre 154412 vel a ni a. Nikhata elevation a tlan nasat ber chu Punjab Kullan atanga Jammu & Kashmir (Dras) kalkawng a ni a, km 85.14 tlanin elevation chu metre 1987 a ni.
8 MPCB bultuma kal a nih angin, a kalna apiangah state PCB hoin an lo dawngsawng deuh zel a. An ni emaw Mizo awmte emaw in a riahna/ innghahna tur an lo ruahman sak thin.
8 Hmun hrang hrangah thuthar thehdarhtuten an kawm bakah university-ah thu a sawi a. Hmun 17-ah a hming pualin thing phun tir a ni.
8 A zinnaah pawisa petu mimal a tawng nual a, a pe tam ber – nufa in Rs.2500 an pe. Mimal atanga a sumfai dawn hi Rs.13000 niin a sawi. Hei bakah mimal ni loa a ei leh in man tumsak an awm nual.
8 A khabe hmul leh lu chu a zin chhung hian a met loa, hmun thenkhatah Muslim emaw tia, an tawnga lo be tawh an awm tih a sawi.