Liverpool-a kum hnih dang cham leh tur Salah

Egypt forward Mohamed Salah chuan kum hnih dang Anfield-a cham chhunzawm turin Liverpool-ah contract a pawtsei.
Tuna a contract neih lai hi kumin nipui thawt ruala tawp ve tawh tur niin, inremna thar an ziah mai loh piahlamah Saudi Arabia lam nena sawizawm a nih hman avangin Reds-a a hma lam hun a chiang lo reng a, tunah erawh kum 32 mi hawilam tihfel a ni a, Premier League-ah kum hnih dang kan hmuh chhunzawm leh phawt dawn.
Salah hian Liverpool tan belhkhawma game 393 a khelh tawhah goal 243 tehreng khung tling tawhin, assist ngawt pawh tum 109 a nei tling tawh a; inremna thar a ziah hnuah a phur takzet tih sawi chungin, “Tun dinhmunah team ropui kan ni a, a hma pawh khan team ropui tak tho kan ni a; contract thar ka ziah leh chhan pawh hi trophy dang tam tak lak belh thei kan ni tih hriatna leh nuam ti taka football ka buaipui theihna hmun a nih vang a ni.
“He hmunah hian kum riat ka khel tawh a, beiseinain kum 10 tal chu ka khelh phawt hmel a; Liverpool-ah hian nuam takin nun ka hmang a, football pawh ka enjoy a, ka career-a kum tha ber ber ka hman mekna hmun a ni,” a ti.
Tun season kal mekah Salah hian inelna hrang hrangah belhkhawmin goal 32 a thun tling tawh a, Premier League bikah goal 27 khungin, Reds-in an club chanchina top-flight title 20-na tur an beisei mekna kawnghah Egyptian hi an inngahna lian pakhat niin, Anfield club hi game sarih chauh khelh tur la awmah league hma an hruai mek a, anmahni hnaihbertu Arsenal lakah point 11-in hma an hruai fal mek a ni.
Kum 2024-25 kal mekah hian Salah chuan Liverpool a zawm hnua league goal thun tam lama season a hman that ber dawttu a tawngbaw mek a, khelh sarih la awmah hian goal 32 pela a khung belh nual rin a ni.
Kum 2017-a AS Roma chhuahsana England a pan hnuah Salah hian Reds thuam inbel chungin Champions League, Premier League, FA Cup, League Cup leh Fifa Club World Cup trophy a hlawhchhuak tawh.
Salah bakah hian Liverpool manager Arne Slot-a player langsar dang pahnih right-back Trent Alexander-Arnold leh centre-back Virgil van Dijk-te contract neih lai pawh tun nipui lai hian a tawp ve tho dawn a, he thu buatsaih lai hian inremna peih fel a la ni ve rih lo.
Netherlands defender Van Dijk-a’n inremna thar ziak tura club lam nen an inbiaknain hma a sawn zel thu a sawi laiin Alexander-Arnold erawh Real Madrid nen vung taka sawizawm a la ni mek thung.