Liverpool an sang tual tual

Pathianni zana English Premier League inkhel ngaihven hlawh takah Liverpool chuan an mikhual Manchester City chu 2-0 in an lo hneh a, table-a an hmahruaina an tizau. Liverpool an chak rual hian team lian Manchester United leh Chelsea te pawhin hnehna an chang ve bawk.
City chelh loh Reds
Manager thar Arne Slot hnuaia khel tha tak Liverpool hian Anfield-ah champion lai Manchester City an mikhual. Anfield-a inhmachhawn team hi team inang lo tak mai an ni a, mualneitu Liverpool hi inelna hrang hranga chetha tak an nih laiin City erawh chuan Pep Guardiola hnuaia an chetchhiat ber tum an tawng ve mek thung. Reds hian inelna hrang hranga vawi ruk ngawt chak thei lo zawn tawh City hi an ngam hle. Si hnih faiin chak bawk mah se, hei aia tama chak thei dinhmunah an ding a, City hian an chhaih buai phak meuh lo a ni ber mai.
Manager thar Arne Slot hnuaia chak thiam thar tak Liverpool hian an mikhual City lakah bul an tan tha viau a, inkhel tan atanga minute 12-na lekah Cody Gakpo chuan awlsam takin hmahruaina goal a thun nghal. Hma takah goal an thun vangin Reds an phur a, an mikhualte an nawr na zui hle. Reds hian hlauhawm takin an khingpuite an nawr fo a, goal an thun belh teuh thei hle. Goal post tih perin an hun tha neih an hlah tlat thung.
Goal luh belh lawk lo mah se inkhel hmuhnawmna a nep phah chuang lo. Mohamed Salah-a’n a hma a sial hret vangin Liverpool hian goal thun theihna hun tha an hlauh a, Salah hian uiawm takin a pet goal lo zui leh tlat bawk. Hun rei tak chhung goal lut a awm theih loh hnuin Liverpool tan hun tha a inherchhuak a, penalty an hmu ta nge nge. A hun tha neih chhawr tangkai thei lawk lo Salah chuan minute 78-naah penalty atangin goal a thun ta nge nge a, an hmahruaina a tizau.
Liverpool in si hniha hma an hruai hnuin City tan bench atanga lut Kevin de Bruyne chuan defender Virgil van Dijk tihsual vangin goal thun theihna hun tha tak a nei a, mak tak maiin a hlah tlat thung. Liverpool lakah tlawm pumpelh tum viau mah se City hian hun tawp thlengin goal an thun thei lo tluan a, hreh tak chungin an tlawm leh ta nge nge a ni.
An elpui lian Manchester City lakah an chak leh tak vangin Liverpool hian khelh 13 atangin point 34 an hmu a, point kua zetin an sang fal deuh tawh. Liverpool an san zel laiin City an hniam ve salh salh thung. Champion lai City hian khelh 13 atangin point 23 an hmu a, pahnihna atangi palinaah an tlahniam hial tawh. City in hmahruaitu Liverpool an phak lohna hi point 11 zet a ni ta bawk. Midfield general an tih mai Rodri chu hliam vangin a chawl mek a. Midfielder ropui zinga mi Kevin de Bruyne pawh hliamin a tihbuai vangin beisei angin a khel tha thei lo bawk. Rodri awm lo leh De Bruyne ngaiawh lo hi City in an tuar hle a, an tlahma leh tlarhnung te inkarah awl a awm zau thei hle. Hei hi goal an chuah fo chhan leh goal thun an harsat chhan a ni tel bawk.
United an chak
Pathianni zana inkhel dangah Manchester United chuan an mikhual Everton chu 4-0 ngawtin an sawp a, manager thar Ruben Amorim hnuaiah a vawi khat nan EPL hnehna an chang.
United tan hian season kal meka beisei phak lo, beisei an phak loh vanga sawisel hlawh pahnih; Marcus Rashford leh Joshua Zirkzee te chuan goal hnih ve ve an thun a, an team an chakpui. An mualah an chak vangin United hia table-ah hma an sawn deuh deuh a, pakuanaah inhlangkaiin table laihawi chung lamah an awm ve ta nge nge.
Pathianni zana inkhel dangah Chelsea in an mikhual Aston Villa chu 3-0 in an sawp ve bawk. United leh Chelsea an chak lai hian Tottenham erawh chu an mikhual Fulham nen 1-1 in an inhnehtawk ve thung.