Liverpool in point hnih an hloh

February 12, Nilai zan khan English Premier League khelh chhunzawm a ni a. Goodison Park-a inkhel hmuhnawm takah Liverpool chuan an hmhruaina an hum zo lova, uiawm takin point hnih an hloh. Khawvel huap pawha derby boruak nei lian ber pawl Mersey Side derby hi boruak lum takin khar a ni a. Hun tawp hnuin player pahnih leh Liverpool player manager Arne Slot ten Red Card an hmu hial a ni. Liverpool an chak zo lo hian an hnuaia awmte phurna thar a pe ngei ang.
Marseyside derby-a inhmachhawn Everton leh Liverpool te hi dinhmun inang lo tak mai an ni a. Mualneitu Everton hi 15-naa awm mek an nih laiin an hmelma lian Liverpool hi table chung berah an awm ve thung. Table-ah an inkar zau viau mah se Goodison Park-a an inkhel erawh a kar a zau lo viau thung. Point 6 a hmahruai fal mektu Liverpool chak teuh viau mah se hun pek belh tawp dawna goal an chhuah vangin mak tak maiin an chak zo ta bik lo.
Everton hian an mikhual Liverpool lakah bul an tan tha viau a, goal an thun hma hle. Inkhel tan atanga minute 11-na lekah ball fing tak hmangin Everton hian Liverpool tlar hnung an thiat. Fing taka Reds tlanrhnung tlanpeltu Beto chuan Liverpool si nghal Alison Becker rin lohna lamah awlsam takin a pet goal a, hmahruaina goal a thun. An hmelma lian Liverpool lakah goal an thun hmasak vangin Everton an phur viau a, inkhel entute thawm a tha viau bawk.
Everton in goal an thun hmasa hi inkhel tihmuhnawm zualtu a ni a. An si phurh sut tuma Liverpool tan khawh a hmuhnawm hle. Arne Slot-a team te hian si an phur rei lova, goal an chhuah hnuin goal an thun zui thuai. Goal an chhuah atanga minute nga hnu lekah midfielder Alexis Mac Allister chuan fuh takin a tauh goal a, minute 16-naah an si phurh sutna goal a thun. Minute 16 chhung lekin goal lut nghal mah se goal dang a luh belh har viau thung a, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, goal pawh a luh belh thei lawk lo. Goal a luh belh theih loh reng hnuin Liverpool an che fuh ta nge nge. Buai deuh nuaih nuaiah karah Mohamed Salah chuan goal thun theihna hun remchang a hmu. Season kal meka chetha tluang tak Salah hian minute 73-naah chiang zetin a pet goal a, Liverpool hmahruai letna goal a thun.
An si phurh sut tumin mualneitu Everton in tan khawh nasa viau mah se an hlawhtling mai thei lo. Hun pek belh tawp dawn thlenga an si phurh an sut theih loh vangin Toffees hi an hmelma lian Liverpool lakah an tlawm ngei tura ngaih a ni hman. An dinhmun chhe viau tawh mah se David Moyes team te an beidawng duh lova a tawp rat thlengin thapui an chhuah. Everton hian an thawhrim rah an seng a, minute 90+8-a James Tarkowski goal ropui hmangin an si phurh an sut a. An mualah ropui takin tlawm an pumpelh. James Tarkowski goal thun hnu hian hun a tawp chawpchilh zui deuh nghal mai a, inkhel hmuhnawm tak; team inhal em emte in khel chu 2-2 in a tawp zui ta a ni.
Inkhel pangngai a tawp a, team hnihte inhuatna erawh a tawp zui ve nghal a ni mai lova, an inhuatna a sosang thar leh ta thut zawk. Inkhel a tawp rualin Everton player Abdoulaye Doucouré chuan Liverpool tantute a chhaih. Abdoulaye Doucouré chezia hi Liverpool player Curtis Jones chuan a lo ngaithei thak lo va, pan hnaiin player pahnihte hi an inbakkaih zui nghal. Buaina a chhuah zui tak vangin boruak a lum leh zual hle.
Boruak sa zualpui a reh hnuin inkhel thununtu Michael Oliver chuan player pahnih Abdoulaye Doucouré leh Curtis Jones te a hnawtchhuak ve ve. Player pahnih a hnawtchhuak hi thil tih awm renga ngaih a ni a, sawisel tur a awm lem lo. Mah se thil mak zawk a thleng zui tlat thung. Player pahnih a hnawhchhuah hnu hian Liverpool manager Arne Slot chuan referee Michael Oliver hi chibai. Slot hian tawngkam tha lo hmang chungin a lo hmer na deuh nge ni dawn Oliver hian Red card a phawrh leh ta mai a, Liverpool manager Arne Slot hi a hnawtchhuak zui ve leh hmiah. Manager Slot a hnawtchhuak hian sawisel a hlawh zui hle a, inhnialna a tam zui phah viau bawk.
Inkhel boruak sang takah an chak zo lo mah se Liverpool hian an hmahruaina point khatin an tihzau belh hret a, Arsenal nen an inkarah point 7 a tla zep thar. An hmahruaina tizau hret bawk mah se an elpui liante khelh zat vawi 14 an khel tling ve ta chiah thung a. Point thuma an hmahruaina an tizau thei lo hi an champion loh chhan a tling thei. An hnuai chiaha awm Arsenal nen an la inhmachhawn leh dawn bawk a. Khelh hmabak 14 an la neihah Reds tan thlamuang taka awmna hun a la awm lo va, inthlahdah thei an la ni lo.