Liverpool in Villa an sawp

Inrinni zan khan Liverpool chuan Anfield-a an mikhual Aston Villa chu si thum faiin an lo sawp a, season tharah an khel tha chhunzawm zel. Inrinni zana inkhel dangah Crystal Palace chuan 3-2 in an mikhual Wolves an hneh ve bawk.
Liverpool hian Anfield-a an mikhual Aston Villa lakah bul an tan tha viau a, inkhel tan atanga minute thumna lekah goal an thun nghal ber. Minute thumnaah hian Alexander-Arnold siamsak atangin Dominik Szoboszlai chuan a club thar tan a goal hmasa ber a thun a, Reds hmahruaina goal a thun. Hma takah goal an thun vangin Jurgen Klopp-a team ten inrintawkna sang zawk an nei a, goal hnih an thun belh leh bawk.
Game thunun hneh tak Liverpool hian na takin an khingpuite an nawr chhunzawm a, goal an thawkchhuak leh thuai. Na taka an nawr rah an seng a, minute 22-naah Villa player Matty Cash chuan an lamah a ti-goal a, Liverpool goal hnihna a thunsak. Hemi hnu hian chawlhlawk hmain goal dang a luh belh thei tawh lova, Reds in si hnih faia hmahruai chungin chawlhlawk an hmang.
Chawlhlawk hnu lamah Liverpool an khel tha chhunzawm a, goal an thun leh thuai. Minute 58-naah Mohamed Salah chuan Darwin Nunez siamsak atangin an goal thumna a thun a, an chakna a nem nghet a. Si thum faiin an chak zui ta a ni. Liverpool hian season tharah an khelh hmasa pali atangin point 10 an hmu a, pathumnaah an awm mek.
Inrinni zana inkhel dangah season tharah beisei phak baka khel tha Crystal Palace chuan Selhurst Park-a an mikhual Wolves chu 3-2 in an hneh a, season thara vawihnih an chakna hun lawmawm an tawng.