Liverpool leh Arsenal in semi-final an lut

Nilai zan khan English Caraboa Cup quarter-final khelh a ni a, team lian Liverpool leh Arsenal ten hnehna changin semi-final an lut. Liverpool leh Arsenal rual hian Newcastle United pawhin semi-final an lut ve bawk.
English Premier League (EPL) hmahruaitu Liverpool hi EPL table mawngphah luahtu Southampton hmachhawn turin St. Mary’s Stadium-ah an lenglut. Mikhual an nihna mualah an khel tha viau a, chawlhlawk hmaa goal hnih an thun an chakpui. Manager Arne Slot chuan kar tawpa Tottenham an hmachhawn tur atan a player tha a awltir a, an player pawimawh Virgil van Dijk, Mohamed Salah leh Dominik Szoboszlai te a chhawr lo. An player thate an awl vangin kum 17 mi Trey Nyoni chuan Reds senior team tan a vawi khat nan a khel a. Kum 20 mi James McConnell pawhin hmun a chang ve bawk. An rawlthar rualte hmuhnawm takin an inlan a, semi-final lut turin an tha tawk.
Manager lai lawk Simon Rusk hnuia inlan Southampton hi Liverpool in an ngam viau a, goal pawh an thun har lo. Reds tan hian Darwin Núñez chuan minute 24-naah hmahruaina goal a thun. Ball chang tam zawk chunga goal an thun vangin Reds hian inrintawkna sang zawk an nei a, phur takin an inlan chhunzawm. Nunez goal thun hnu hian Harvey Elliott chuan minute 32-naah an goal hnihna a thun zui leh a, si hnih faia hmahruai chungin chawlhlawk an hmang.
Chawlhlawk hmain goal thun thei lo mah se mualneitu Southampton in chawlhlawk hnu lamah goal an thun thuai. Minute 59-na lekah Cameron Archer chuan goal thunin an si phurh a sut then. Team lian lakah goal an thun vangin an phur thar a, an mualah tlawm pumpelh ngei tumin tan an khawh zui nasa hle. An si phurh sut tum viau mah se hun tawp thlengin goal dang an thun belh thei tawh lova, Liverool chuan 2-1 a hnehna changin semi-final an lut zui ta a ni.
Arsenal chakpuitu Jusus
Arsenal chuan Inrinni zana an hmachhawn tur Crystal Palace chu Emirates Stadium-ah an mikhual a, Gabriel Jesus hattrick siam hmanga hnehna changin semi-final an lut.
London derby-ah Crystal Palace in bul an tan tha viau a, inkhel tan atanga minute lina lekah Jean-Philippe Mateta chuan hmahruaina goal a thun nghal. Hma taka goal chhuah mahse Arsenal an insiamtha thei lawk lova, chawlhlawk hmain goal an thun thei lo.
An si phurh sut thei lawk lo mah se Gunners hian chawlhlawk hnu lamah goal an thun ta thuai thung. Minute 54-naah Brazil forward Gabriel Jesus chuan goal thunin an si phurh a sut. An si phurh an sut hnuin Gunners an khel tha zui viau a, goal hnih an thun belh leh. An si phurh sutna goal thuntu Gabriel Jesus chuan minute 73 leh 81-naah goal thunin hattrick a siam. Jesus-a’n hattrick a siam hnu hian Arsenal player hlui Eddie Nketiah chuan minute 85-naah Crystal Palace tan goal a thun a, an si phurh a sut then. Nketiah goal thun vangin phur thar viau mah se Eagles hian hun tawp thlengin goal an thun belh thei tawh lova, an mualah an tlawm zui ta a ni.
Crystal Palace leh Arsenal hi inrinni zan hian EPL-ah an intum zui leh dawn a, Gunners hi Selhurst Park-ah an lenglut ve thung ang.
Newcastle pawh an tlang
Nilai zana inkhel dangah Newcastle United chuan an mikhual Brentford hu 3-1 in an hneh a, semi-final an lut ve bawk.
Newcastle United tan hian Sandro Tonali chuan goal hnih a thun a, Fabian Schär chuan goal khat a thun ve bawk. Brentford tan hian Yoane Wissa chuan minute 90’+1 -naah goal thunin an si phurh a sut then naa tlawm an pumpelh zo ta chuang lo a ni.