Liverpoool leh Spurs an chak

Inrinni zana EPL inkhel hmuhnawmah Liverpool leh Tottenham Hotspurs ten an khingpuite an lehthal ve ve a, point thum an hmu ve ve. Reds hian 3-1 in Wolves an hneh a. Tottenham hian hun pek belha goal hnih an thun hmangin Sheffield United an lehthal ve bawk.
Team lian Liverpool hi Wolves hmachhawn turin Molineux Stadium-ah an leng lut a. An lenluhna mualah goal an chhuah hma hle. Wolves hian inkhel tan atang minute sarihna lekah Hwang Hee-Chan goal thun hmangin hma an hruai nghal mai a, team lian an barakhaih. Hma taka goal an chhuah hnuin Liverpool an insiamtha hret hret a. Chawlhlawk hmain goal thun thei lo mah se, chawlhlawk hnu lamah goal thum an thun ta thung.
Chawlhlawk hnu lamah Reds hi tha zawkin an inlan a, goal an thun thuai. Minute 55-naah Gody Gakpo chuan Mohamed Salah siam tha tak chu hnaite atangin a pet goal a, an si phurh a sut. Gakpo goal thun hnu hian goal a han vang vang a, hun tawp dawn hnaih lamah goal hnuh tur a awm leh chauh. Hun tawp dawn hnaih minute 85-naah Salah siamsak tha tak chu Andy Robertson chuan awlsam takin a pet goal a, hma an hruai letna goal a thun.
Reds in hma an hruai let hnu hian goal thun belh tumin tan an khawh zui a, hun pek belhah an vannei zui leh. Hun pangngai tawp hnu, hun pek belh minute khatnaah Wolves player Hugo Bueno chuan Harvey Elliott pet kawh tak mai chu an lamah a dang lut palh a, Liverpool goal thumna a thunsak. Hemi hnu hian goal dang a luh belh tawh lova, Reds in hnehna pawimawh an chang.
Wolves lehthaltu Liverpool hi season tharah an khel tha chho viau a, an khelh hmasak pangaah tlawm an la nei lo. Khelh nga atanga point 13 hmuin, pathumnaah an awm mek. Wolves hian khelh nga atangin point thum chauh an la hmu thung a, 15-naah an awm mek.
Inrinni zana inkhel dangah manager thar Ange Postecoglou hnuaia khel tha tluang tak Tottenham Hotspurs an tlawm teuh hle a, hun pek belha goal hnih an thun hmangin an mikhual Sheffield United chu 2-1 in an lehthal thei hram. Sheffield United lakah vanneihthlak taka hnehna an chan leh tak vangin Spurs hi pahnihnaah an awm chhunzawm zel.
Tottenham muala inkhelah hian goal a thun har hle. Minute 73-naah mikhual team Sheffield United tan Gustavo Hamer chuan hmahruaina goal a thun nawlh a, he goal hi an chakpui teuh hle. Tottenham hian an si phurh sut ngei tumin tan khawh mah se minute 90 chhungin goal an thun thei lova, hun pek belh tir lam thlenga goal an thun theih loh zel vangin an mualah tlawm ngei tura ngaih an ni hman. Dinhmun chhe takah ding mah se beidawng mai lovin an bei fan fan a, goal an thun ta nge nge. Hun pek belh minute riatnaah goal a thun theih loh vanga buai hman Richarlison chuan goal pawimawh thunin, an si phur a sut.
Richarlison goal thun hian Spurs a fuih phur thar hluai a, na takin an mikhualte an nawr zui nghal zat. An thawhrim rah sengin minute 90+10-ah box chhungah vengtu nei lova awm Dejan Kulusevski chuan hma an hruai letna goal a thun. Si phur zawka an tan hnuin Sheffield United an vanduai chhunzawm a, minute 90+14-ah Oliver McBurnie hnawhchhuah a ni. Tlem zawk leh si phurh zawk an nih vangin Sheffield tan chet a har tawh a, team lian lakah uiawm takin point an hlawhchhuak zo ta lo.
An forward pawimawh Harry Kane an chan vangin Tottenham hi chetha hluai tura beisei an ni lo. Manager thar Ange Postecoglou hnuaiah an khel tha ta viau thung a. Season tharah tlawm nei lova kaltluangin, khelh nga atangin point 13 an hmu a, pahnihna an ni chhunzawm. Hetihlai hian Championship atanga kaisang Sheffield United erawh chuan khelh nga atangin point khat chauh an la hmu ve thung.