LMC budget-ah nuai 2463 pawm Property tax khawn ve tan dawn

LMC budget-ah nuai 2463 pawm
Property tax khawn ve tan dawn
Lunglei Municipal Council Board of Councillors (BoC) chu an chairman Lalzuithanga kaihhruaiin an thukhawm a. Finance changtu executive councillor Zorinsanga Hmar chuan kum 2025- 2026 atana LMC sum hman dan tur ruahmanna, budget pharhin, sawiho a nih hnuah pawm a ni.
Budget 2025-2026 atan hian Rs. 24,63,97,208 ruahman a ni a. Tax leh non-tax revenue atangin nuai 2086.73 leh capital receipts-ah Rs. 3,77,24,208 hmuh beisei a ni.
BoC thukhawm chuan kumin atang hian LMC huamchhungah Garbage Free City Lunglei Project kalpui tura relin, ward number 1, 2, 9 leh 11 chu pilot project atan ruahman a ni. Kumtin ward dangah kalpui belh zelin, kum thum chhungin ward 11 tuamchhuah tum a ni a. State sawrkar sum leh urban local body grants atanga hmalak dan ngaihtuah nise, tih a ni.
State sawrkarin LMC chu property tax 2024 -2025 khawn phalna a pek tawh angin inbuatsaih mek a ni tih sawi a ni a. Property tax khawn dan tur hi mipuiah inhrilhfiah hmasak nise, property tax khawn chu mipui hnenah a luanglet tih an hriatchian theihnan zirtir nise, tih a ni. Property tax khawn dan tur inkaihhruaina siamrem nghalin, Ward Committee kaltlangin ward development-ah 80%, local council kaltlanga hmasawnna hna thawhnan 15% leh LMC-ah 5% kal tura duan a ni. Tum dan hmasaah chuan Ward Committee-ah 80%, LC-ah 5% leh LMC-ah 15% tih niin, LMC leh LC chanpual hi thlakthleng a ni.
Nikum chhung khan parking fee atangin Rs. 18,31,349 khawn chhuah a ni tih report a ni a. LMC BoC thukhawm chuan hei hi a bo a bang awm loa mipui tana hman nise tiin, Lunglei khawpui chhung traffic marking leh mamawh bakah kawngpui siamna atan hman nise, an ti. LMC huamchhunga ui leh vawk khuahkhirhna dan hman lailawk tur chu pawmin, LMC hnuaia co-terminus a thawkte medical leh TA bill theihna tur ruahmanna an pawm bawk.