LMC budget cheng nuai 1644.62

ncil 6th Board of Councillor chu an chairman Lalzuithanga kaihhruaiin June 21 khan an thukhawm a. Business pasarih sawiho a ni.
Board of Councillor (BoC) thutkhawmah hian 2024-2025 atan budget pharh a ni a. A pharhtu executive councillor Zorinsanga Hmar chuan Lunglei Municipal Council (LMC) chu 2023 January 13-a state sawrkarin a din chauh a ni a, Lunglei khawpui hmasawnna hna thawhna tur sum mawmawh pawh kumin atang hian sawrkarin budget a dah tak avangin Budget Session hmasaber an nei thei ta tih a sawi.
2024- 2025 sawrkar kuma State Tax Devolution atanga grant in aid hmuh tur chu cheng nuai 602.97 a ni a. Kum hmasa aia punna zaa 339.47 a ni. Hei bakah hian capital receipts an hmuh tur hi 2nd Mizoram State Finance Commission rawtna angin Mizorama urban local body tana grant a pek atangin Aizawl Municipal Corporation nen insem a la ngai a. Hei hi 15th FC thutkhawm dawn laia LMC la pian loh vang a ni. Finance Commission atanga grant hmuh tura beisei chu nuai 923.11 a ni. Hei bakah hian LMC-in thawhchhuah a inbeisei zat chu nuai 118.54 a ni. Heti hian 2024- 2025 budget ruahman nuai 1644.62 chu pawm a ni.
Municipal Valuation Committee-in ‘Property Tax Grading’ a siam chu pharha sawi ho a ni a. Grading thuma siam niin, grading ‘A’ hi main road leh commercial area bulhnai kawngpuia awm, grade ‘B’ hi metalled road kawngpui leh a thlen theih chin hmun; grade ‘C’ hi internal road (kucha road) leh lirthei thlen theih lohna hmun nise, tia rawt chu tha an ti. Floor rate pawh hetiang hian bituk a ni a. Grade ‘A’ 3% aia sang lo tur, grade ‘B’ 2.5% aia sang lo tur, grade ‘C’ 2.0 aia sang lo tur tur tih a ni.
Awlsam zawka property tax a khawn a nih theih theih nan 2024- 2025 ULB grant atanga hnathawh tur ruahmanna hrang hrang sawiho nise, hei hi 2024- 2025 budget siam mila ruahman theih nise, an ti. Sum hi kumina hmuh beisei a nih avangin ruahmanna hi a hmalama thehlut tura pawm a ni.
Urban Forestry Project kalpui chu Executive Council thukhawmin tha a tih angin, Darkhuang Tlangah thing phun a ni a. LMC huamchhungah he project hi kalpui leh tura ruahmanna niin, a hmun thlan fel lawk tura pawm a ni.
Khawlaia ui chhuak khuahkhirhna tura dan tlawhchhan theih ruahman nise tih a nih angin, ‘Lunglei Municipal (Regulation and Control of Dogs)’ chu Executive thutkhawm hmasa leh BoC-in a rel tawh angin, regulation anga kalpui tha tih a ni.
LMC hnuaia Ward hrang hrang hmasawnna atana councillor-te hman tur – Councillor Development Fund / Urban Local Body Grant/ Propety Tax Return tangkai zawk leh kalphung fel zawka hman a nih theih nan kaihhruaina siam a ni a. 2024 April 1 atanga nung tan angin pawm a ni.
LMC hnuaia Lunglei Local Council Association-in rawtna a thlen angin, hnatlang phat/ inrun rate siam a ni a. The Mizoram Municipalities (Ward Committee and Local Council) Rules 2010 Section 29-in a sawi – “tha a tih chuan municipal thuneitu in an bithliah thei ang” tih a nih angin, rawtna lut hi sawihoin rate an siam a, LMC huamchhungah khawtlang hnatlangah hnatlang phat Rs 200 leh inrun Rs. 400 nise, tia pawm a ni.