LMC leh HPC a ngaiin awm dawn Municipal hi tribal tan a him lo – CM

LMC leh HPC a ngaiin awm dawn
Municipal hi tribal tan a him lo – CM
High Power Committee (HPC) Lunglei leh Lunglei Municipal Council (LMC) chu thiah zawk awm loin a ngai anga kal zel phawt turin cabinet-in a rel tih chief minister chuan a sawi a. Municipal neih hrim hrim chu tribal tan a him lo tih a sawi.
Assembly Session-ah chief minister Lalduhoma chuan, Lunglei HPC chu executive order behchhan ringawta dah a tawk loa, Assembly House-in dan siamin pass se, hemi hnuaiah hian thuamthat a, hmasawnna hna tam zawk thawk theiin, sawrkarin a duh duha a tih theih loh tura legislate ngei nise tih chu an lo aupui thin dan a ni tih a sawi a. Hemi hnua Lungleiin municipal a neih tak si ah chuan, municipal awm hma leh awm hnu a inang thei ta lo tih a sawi.
An sawrkar hnu ah inrenchemna a kalpui avangin Resource Mobilization Committee an din a, an ni rawtna thehluh zingah LMC a pian tawh avangin HPC awm a tul tawh lo, tih a tel thu a sawi. HPC leh LMC chu an hna inhnaih te te a nih avangin thuneihna inchuh leh engemaw inhriatthiam loh palh awm thei a ni a, ‘single agency’ hnuaiah awm mai se, a pakhatah eng party emaw awmin pakhatah eng party emaw awm se, inhruipawhna a ni thei dawn, tiin, LMC thuam chak mai an rawn rawt tih a sawi.
Resource Mobilisation Committee rawtna hi ngun taka cabinet thukhawmin a ngaihtuah hnuah, an rawtna chu awm lo ti lo mah se, HPC leh LMC chu a ngaiin awm phawt se, tih chu an thutlukna a ni tih a sawi.
Municipal hrim hrim chu a awm tirh atanga ‘welcome’ lo tu a ni tih Lalduhoma hian a sawi a. India danpui siam dawnin Bordoloi Committee chuan tribal ho min rawn zirchiang a, Zofate chu kan chhehvela hnamdang, Bengali-te nen rorelna pakhata awm chi lo, custome hrang tradition hrang nei kan nih avangin India danpui hnuaiah special provision engemaw siamsak loa hrutrual mai chuan a chi loh, tiin danpui thar turah Sixth Schedule siamsak an rawt a, constituent assembly-ah member tam zawkin duh lo mah se, Dr BR Ambedkar ten theihtawpa tan an lakna azarah Sixth Schedule kan nei ta tih a sawi.
Meghalaya chuan state an nih hnu ah pawh Sixth Schedule hi an chhawm zel a, an state pum deuh thawh, Shillong-a hmun tereuhte tih loh chu tribal area an la ni a, District Council an la nei vek a, an buai lo tih sawiin, “Sum duh vangin Aizawlah Municipal kan din a, Lungleiah kan din leh a, politic khelhnan vote zawnna atan kan hmang chho zel dawn niin a lang. Tribal kan nihna nuaibona atan rawn hmang dawn se a tha dawn lo hle a ni,” a ti.