LMC thawktuten MUHCS zawm dawn
Lunglei Municipal Council-a thawktute chuan Mizoram Universal Health Care Scheme (MUHCS) an zawm dawn.
Lunglei Municipal Council (LMC) Board of Councillors (BoC) chu an chairman Lalzuithanga kaihhruaiin July 11 khan an thukhawm a. Sawrkar thuchhuakin a hnuaia hlawh la reng rengin MUHCS zawm tura thu a tihchhuah chu sawiho niin, LMC office-a thawktuten MUHCS hi a nih anga pawm an remti. ‘The Mizoram Urban Areas Building Regulations 2024’ chu LMC huamchhunga hman turin an pawm a. ‘The Lunglei Municipal Council Building Regulations 2023’ chu state sawrkarah pawmpui tura thehluh a nih laiin, sawrkar hian ‘The Mizoram Urban Areas Building Regulations 2024’ hmang zawk turin rawtna a siam a. He rawtna zulzui hian LMC huamchhungah he Regulations hi hmang turin thutlukna an siam a ni.
LMC huamchhunga mihring cheng leh chenna in awm zat chhinchhiahna, official data rintlak tak a awm theihnan Directorate of Economics & Statistics nen thawk dunin, LMC huamchhunga chhiarpui (demographic census) kalpuina senso tur ruahmanna siamthat chu thlir hoin, sum senso tur zat nuai 7.5 leh a hmanna tur ruahmanna pawm a ni a. BoC thutkhawm hmasaka LushAlTech nen thawh dun remtih a nih angin LushAITech dawr an nih hnuah, cheng nuai 2.5 sengin LMC tana artificial assistance apps siam theih a nih tur thu dawn a ni. Hei hi BoC chuan pawmin, memorandum of understanding siama bawhzui nghal nise, an ti.
LMC hnuaia bawlhhlawh paih man (sanitation fee) hmuh atanga faina hna thawk (sanitation worker) mi 5 chhawr mekte lawmman tihpunna tur pawh pawm a ni bawk.
Chairman chuan LMC hnuaia hmalakna a sawi a. Licensing Regulations hnuaiah phalna (licence) 2237 pek chhuah a ni tawh a, in sak dilna (building permission) lut 338 zingah phalna (NOC) pek 233, nghah mek 92 leh pek theih loh 13 a awm. Advertisement & hoardings chu tender hmanga kalpui a ni a, dilna lut tawh 29 chu a vaia phalna pek a ni. Vawk leh ui khuahkhirhna dan (temporary guidelines) hman mekah local council-te kutah mawhphurhna hlan a ni a; block 46 atan parking tender chhanna hawn mek a ni.
Solid Waste Management Centre-I hnuai atangin ward tinah bawlhhlawh bawm 450 theuh sem a ni a, garbage truck motor – 407 truck pakhat leh pik-up 2 inhlan tawh a ni. Solid Waste Management Centre hnuaiah IEC component atangin cheng nuai 10 dawn a ni a, mipui hnena inzirtirna kalpuina tur leh tul danga hman tur a ni. Property tax chungchangah online payment apps tihfel a nih hnuah mipuiah an pek tur zat puanzar a ni tawh a, kumin August 4 thleng sawi buai duh tan hun hawn niin, mi engemawzatin chhiah an pe tan mek a, tih dik ngai leh zirthat ngaiah hma lak mek a ni.
Chairman report-a a lan danin, LMC huamchhung zau zawng hi km. 153.659 bial (square kilometre) niin, tunah LMC huamchhungah mihring 75000 awm anga chhut a ni. LMC hnuaiah thawktu – officer leh staff 37 an awm mek.
Get real time updates directly on you device, subscribe now.
Prev Post
Next Post