Lo neituten nipui thlai an ching phur
Lo neituten nipui thlai an ching phur
Indian lo neitute chuan kum danga July thlaa fur ruah tla thin pangngai aia tam ruah an dawn mek laiin nipuia chin chi thlai chi hrang hrang – buh, bekang, la leh vaimin te nasa takin an ching thar mek.
Indian economy hi fur ruahtui tlaa innghat a ni a, lo, tuikhuah leh tui in zawng zawng 70% zet hi ruah tui rin a ni.
India-a lo zahve dawn hi tui lakna nei lo, June-September chhunga ruah sur rinchhana kalpui a ni.
June 1 atanga fur a intan atang khan tun thlen thlengin India-ah hian a sur dan thin pangngai aia 6% vela tam a sur tawh a. Lo neitute chuan Zirtawpni thleng khan ram hectare maktaduai 70.83-a zauvah nipui thlai an ching tawh niin Ministry of Agriculture & Farmers’ Welfare chuan a sawi.
Lo neitute hian ram hectare maktaduai 17.67-a zauvah buh an tuh a, nikum tun ang huna an chin aiin 12.4%-in an ching zau zawk a. Buh hi sorkar hnena an hralhna man a pun hret avangin lo neitute pawhin tam zawk thar tumin an bei a, zau zawkah an ching.
India hi khawvela buh thawn chhuak tam ber ram a ni a, thlai atanga siam tel, palm oil leh soyoil ang chi erawh a la lut tam ber ram a ni thung.
Lo neitute hian ram hectare maktaduai 11.17-a zauvah bekang an ching tawh a, nikum tun ang hun aliin hectare maktaduai 11.9 zetin a chinna hmun a la zim zawk a; mahse, kar liam ta atang khan an ching tam tan thung. Vaimim pawh hectare maktaduai 7.1-a zauvah chingin nikum khan hectare maktaduai 6.17-a zauvah chin a ni.
La pawh hectare maktaduai 9.86-a zauva ching tawhin nikum aiin a chinna hmun zau zawk hi 3.4%-in a hniam a; mahe, bekang ang bawkin kar liam ta atang khan an ching uar tan thung a. Be lam chi dang erawh nikum aia 2.3%-a zauvah chingin hectare maktaduai 8.2-a zauvah an ching tawh a ni.
Farm ministry hian lo neituten an thlai chin dinhmun leh an chinna zau zawng hi state hrang hrang sorkar atanga la khawmin a chhinchhiah thin.
Lo neitute hian sorkarin buh a leisakna man a san hret avangin kuminah an ching uar zual a, a thar pawh a tam zawk ngei a rinawm niin Mumbai-a khawvel puma thawn chhuaktu pakhat chuan a sawi.