Lo siam tlem kumah buh thar hlawk

Kolasib district-in buh thar hnem ber, Mizoram sawrkar hnuaia Directorate of Economics & Statistics buatsaih, nikum December ni 10-a tihchhuah “Statistical Abstract Mizoram 2023” in Mizoram buh tharchhuah dan a tarlan dan chuan, lo neih tlem ber kum 2021-2022 kha, kum 10 kal ta chhunga Mizoramin buh a thar hlawk ber kum a ni.2021-22 chhung khan Hectare 16,008-a zauah buh chin a ni a, heta buh tharchhuah zat hi metric tonne 37,137 a ni a; chu chu hectare khat (metre 100 bial)-ah buh Kg 2,319 (23.19 qntl) zel thar ang a ni. 2021-22 chhunga lo neih tlem chhan kha Covid-19 hripui nghawng vang nia ngaih a ni.
Kum tina Mizorama buh chinna zau zawng hi a lo berah hectare 34,000-38,000 inkar vel a ni thin a. Kum 2021-22 tih loh, kum dangah chuan a tlangpuiin hectare khatah buh Kg 1,500-1,700 vel tharchhuah a ni thin.
Kum 2022-23 chhunga Mizorama buh tharchhuak hnem ber chu Kolasib district a ni a, hectare 5,223-a zauah buh metric tonne 11,579 an thar chhuak a, hectare khatah Kg 2,216 zel thar chhuak ang a ni. Champhai district chu buh chinna area nei zau ber niin hectare 5,913-ah buh metric tonne 11,395 an thar chhuak a, hectare khatah Kg 1,927 zel tharchhuak ang a ni bawk.
Buh chinna hmun zau zawng azira thar hlawk ber chu Hnahthial district niin, Hectare 852-a zauah metric tonne 1,090 an tharchhuak a, hectare khatah Kg 1,279 zel tharchhuak ang a ni.
A pumpui thuah kum 2022-23 chhung khan hectare 34,071-a zauah buh chin niin heta tanga buh tharchhuah belhkhawm chu MT 58,836 a ni a, chawhrualin hectare khat-ah Kg 1,726 (Qntl 17.26) zel tharchhuak ang a ni.
Kum 10 chhunga Mizoram buh thar dan
Year Ha MT Kg/Ha
2013-14 38,803 58,994 1,520
2014-15 36,930 60,679 1,643
2015-16 37,153 62,089 1,671
2016-17 36,858 61,516 1,669
2017-18 36,114 59,505 1,650
2018-19 35,550 60,010 1,688
2019-20 35,210 60,239 1,711
2020-21 35,246 62,182 1,764
2021-22 16,008 37,137 2,319
2022-23 34,071 58,836 1,726