Loan rul tha lo dahkham laksak

Securitisation and Reconstruction of Financial Assets and Enforcement of Security Interest Act 2002 (SARFAESI Act 2002) hmangin Mizoram Rural Bank (MRB) Champhai Branch hnuaia loan la, rul tha lo mi pathumte in ding lai, loan lak nana dahkham chu Champhai district magistrate James Lalrinchhana thupek angin chhuhsak an ni a, MRB Champhai Branch kuta hlan nghal a ni.
District magistrate hian SARFAESI Act 2002 hnuaiah Champhaia chhunga loan rul tha lo mi pathumte laka dan kengkawh turin thupek a tichhuak a. Sub-divisional magistrate Dr Manesia Khaimeichho kaihhruaiin MRB hotute leh Police ten SARFAESI Act 2002 hnuaia Section 14 (14)(i) in thuneihna a pek tlawhchhanin loan lak nana dahkhamte chu loan rulh that loh (non-performing assets) avangin lilam turin an chhuhsak a ni.
Ram dahkham chhuhsak hi Champhai Dinthar Veng, Bethel Veng leh Zote ah in pakhat theuh a ni a. In dinglai chhuhsak takte hlutzawng belhkhawm hi a hniam thei ang bera chhutin Rs. 92,39,329 vel niin, an loan rulh ngai la bang hi Rs. 57,36,424 a ni. Loan rulh ngai aiah hian an ram dahkham chhuhsakte hi bawhzui tul angte tihfel a nih hnuah lilam tum a ni ang.
SARFAESI Act 2002 hmang hian Champhai district magistrate thupek bawhzuiin kumin April 5 khan Champhai khawpui chhunga in dinglai 5 chu loan rulh that loh avangin chhuhsak an lo ni tawh a. May 2 khan Champhai veng hrang hranga ram/ in hmun 6 pawh chhuhsak an lo ni tawh bawk.